İşğal etilgen Qırımda qanunsız şekilde qazma işleri yapqanından şübelengen Rusiye arheologı Aleksandr Butâginniñ apis müddeti Varşava rayon mahkemesi tarafından ilk yaz ayınıñ 1-ne qadar uzatıldı.
Suspilne Qırımğa "Slawa TV" bu aqqında haber etti.
Saban ayınıñ 18-ne onıñ Ukrayinağa ekstraditsiyası boyunca oturış planlaştırıla.
Slawa TV mühbiriniñ bildirgenine köre, Butâgin özü bugünki oturışta yoq edi, çünki apis müddetiniñ uzatılması onıñ iştiragini talap etmey.
Jurnalistlerge muracaat etken Rusiye arheologınıñ advokatı dedi ki, davanı adliyeci Dariuş Lübovskıy baqmağa devam etecek.
"Alimler tarafından imzalanğan ve mahkemege berilgen arheolognıñ destek mektübi aqqında sualge cevap bergende, adliyeci onıñ mündericesini aydınlatmadı, tek Frenkistan, Poloniya ve İtaliyadan alimler imzalağanını qayd etti, eñ çoq insan soñki memleketten kele", — dep haberde qayd etildi.
"Slawa TV"niñ haber etkenine köre, oturışta az jurnalist edi. Olardan biri "RİA Novosti" neşiriniñ işaretsiz çalışqan hadimi edi. Anda Rusiye elçiliginiñ temsilcileri de bar ediler.
Hatırlatamız ki, kiçik aynıñ 10-nda Varşavadaki Apellâtsiya mahkemesi Poloniyada Butâginniñ vaqtınca apis etilmesiniñ qanuniyligini tasdıqladı.
Mahkemeci, bugünki oturış tek 2025 senesi ilk qış ayına tayin etilgen apis müddetiniñ birinci qısmına ait olğanını añlattı. Bu dava çerçivesinde Butâginniñ adliyecileri ev tevqifini teklif etip ve Varşavadaki daire kiralav añlaşmasını taqdim etip, sıñırlav tedbirini deñiştirmege tırıştılar.
Aynı zamanda mahkemeci qayd etti ki, vaqtınca apis arheolognıñ areketlerine qıymet kesmey, ekstraditsiya tedbirlerini temin etmek ve qaçmaq imkânını yoq etmek içün qullanıla.
Rusiye arheologı Aleksandr Butâgin ilk qış ayınıñ 4-nde Felemenkten Poloniya üzerinden Balqanlarğa ketkende Poloniya mahsus hızmetleri tarafından tutuldı. Poloniya kütleviy haber vastalarınıñ malümatına köre, o, Poloniya prokurorlığı ögünde ifade bermekten vazgeçti. Onı 40 künge apiske aldılar.
İlk qış ayınıñ 23-nde Ukrayina resmiy şekilde Poloniyağa, işğal etilgen Qırımda qanunsız qazma işlerinen oğraşqanında şübelengen ve Varşavada tutulğan Rusiye arheologı Aleksandr Butâginniñ ekstraditsiyası aqqında muracaat yolladı.
2022 senesi Rusiye arheologı Aleksandr Butâgin işğal etilgen Qırımnıñ Keriç civarındaki qadimiy Mirmek şeerinde qazma yapqanda, Rusiyege çıqarılğan Aleksandr Makedonskiy zamanına ait 30 para hazinesini taptı. Onıñ fiyatı 8,5 million ğrıvnâdan ziyadedir. İşğal etilgen Ukrayinada qanunsız çalışqanı içün şübelendi.
Qırım Muhtar Cumhuriyeti prokurorlığı Suspilne Qırımğa Butâginniñ dava açılğan bir qaç arheologdan biri olğanını bildirdi: umumen yedi şübheli, olarnıñ arasında Qırımdaki qazmalarda iştirak etken em Rusiye, em de Ukrayina vatandaşları bar. Qırımnıñ Rusiye arheologları tarafından nasıl zapt etilgeni aqqında tafsilâtlıca malümatnı maqalede oquñız.
Qara qış ayınıñ 12-nde Varşava mahkemesi Rusiye arheologı Aleksandr Butâginniñ apis müddetini saban ayınıñ 4-ne qadar uzattı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
