Saha Manğubi — qaray. O, işğal etilgen Qırımda 2024 senesi boş ayda ğayıp oldı. Qadınnıñ tuvğanları iddia ete ediler ki, onı gizliden gizlige alıp ketkenler. İşğalli polis hırsızlav davasını açmaqtan vazgeçti ve Federal havfsızlıq hızmetine (FSB) muracaat etmege tevsiye etti. Oña qarşı "devlet hainligiRF CQniñ 275-nci maddesi" davası açılğanı belli oldı. Bütün bu vaqıt devamında onı inkomunikadoBu, işğalcilerniñ insanlarnı tutqanlarını tanımamaları, bulunğan yerlerini bildirmemeleri ya da qabaatlamaları demektir statusında tuta ediler.
IRADE teşebbüsiniñ uquq qorçalayıcıları "Tribunal. Qırım epizodı" uquq qorçalayıcı teşebbüsine bunı bildirdiler.
Uquq qorçalayıcılarnıñ malümatına köre, bir qaç kün evelsi işğal "Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ — terciman) Kıyiv rayon mahkemesi" qaray Saha Manğubini "devlet hainligi"nde qabaatlap, oña nezaret altında tutuv şeklinde bir tedbir sayladı. "Mahkeme"niñ resmiy saifelerinde içtimaiy ağlarda bu "mahkeme"niñ aqqında iç bir şey yazılmadı.
"Şimdi qaraylarğa basqı qullanmağa başladılar. İşğal etilgen Qırımda ilk qaray siyasiy reberi resmen apiske alındı. Keçken sene boş ayda hırsızlanğan ve devlet hainliginde qabaatlanğan Saha Manğubi aqqında söz yürsetile. Qadınnıñ eki balası azatlıqta qaldı", — dep "Tribunal. Qırım epizodı" yazdı.
2024 senesi ZMINA yazğanı kibi, boşanğan soñ Saha evni kiraladı, anda oğlu ve qızınen yaşadı. 2024 senesi boş aynıñ 2-nde o, balalarnı anasına qaldırıp, işke ketti.
"Men endi öz işime ketmek kerek edim. Men bekleyim — o yoq. Telefon ettim, kimse cevap bermedi. Aqşam saat beşte evniñ saibi telefon etip ayttı ki, qızımnı maska taqqan adamlar alıp kettiler", — dep Qırım sakiniñ anası tarif etti.
Qomşusınıñ aytqanına köre, o vaqıt kimse özüni tanıtmadı ve bir şey köstermedi.
"Sadece qoradan keçip, Sahağa bardılar. Maska taqqan beş adam saat 2-den 5-ke qadar evni tintti, soñra öz şaatlarını ketirdi, olar bir şey imzaladı ve qadınnı alıp ketti", — dep ZMINA yazdı.
Aile yarım yıl devamında FSBge bir çoq muracaatqa cevap almadı. "Bizde böyle bir qadın yoq" dediler.
"Tuvğanları, ğayıp olğan qadınnıñ qıdıruv aqqında poliste dava açılmasını talap etken ediler, amma olarnıñ arizası öyle de qabul etilmedi. Er angi sual olsa, onı FSBge bermege dediler. Bugünki esas vazife — Sahanı uquqiy alanğa çıqarmaq, bundan soñ qoruv sızığını qurmaq mümkün olacaq", — dep ZMINA qayd etti.
Yaqınları, onıñnen bir kamerada bulunğan qadından, Sahanıñ Simferopolnıñ (Aqmescitniñ) SİZO-2-de tutulğanını ögrendiler. Onı nenen qabaatlaylar — belli degil edi.
"Tribunal. Qırım epizodı" leyhasınıñ uquq qorçalayıcıları zorbalıqnen yapılğan ğayıp oluvlardan soñ alâ daa habersiz qalğan eñ az 20 Qırım sakininiñ adlarını bileler.
"Halqara uquq insan hırsızlavını açıqtan-açıq cenk cinayeti olaraq tanıy. İnsanlarnı apis etilgen Qırım sakinleriniñ aytqanları kibi, böyle şaraitte bütünley izolâtsiya etüv, insanğa qarşı yapılğan areket olaraq tanılmaqta ve bu da cenk cinayeti sayıla. Bu cinayetlerniñ teşkilâtçıları, icracıları ve yardımcıları halqara mahkemede cevap berecek", — dep uquq qorçalayıcılar qoştılar.
Bundan evel Suspilne Qırım, işğalciler Qırım sakinlerini ne içün inkommunikado statusında tutqanlarını — tutulğanlarını tanımayıp ve bir qabaatlav da çıqarmayıp, ğayıp olğan Qırım sakinleriniñ soy-soplarına ne yapmaq kerek olğanını añlattı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
