Ukrayina prezidentiniñ Qırım MCdeki daimiy temsilcisi Olğa Kurışko Türkiyedeki Anadolu universitetiniñ rektorı Yusuf Adigüzel ile qırımtatar studiyalarınıñ inkişafı aqqında memorandum imzaladı.
Qara qış ayınıñ 29-nda prezidentniñ QMCdeki temsilciligi bunı bildirdi.
Vesiqa, tasil ve ilim saasında ukrayin-türk işbirliginiñ terenleştirilmesini, zemaneviy ukrayin studiyaları ve işğal etilgen Qırım aqqında tedqiqlerniñ desteklenmesini, em de Ukrayina tamır halqlarınıñ medeniy mirasını saqlap qalmasını ve Rusiye sahte malümat ikâyelerine qarşılıq kösterilmesini közde tuta.
Körüşüvde Türkiyedeki Ukrayina elçisi, sabıq siyasiy mabüs Nariman Celâlov da bar edi.
"Ukrayina studentleriniñ global koalitsiyası birinci Ukrayina hanımı Olena Zelenskanıñ desteginen Ukrayina Prezidentiniñ Tasil, ilim ve sportqa qol tutuv fondı, Ukrayina İnstitutı ve Ukrayina Prezidentiniñ Qırım MCdeki temsilciligi/Qırım platforması Ofisi, Ukrayina Tasil ve ilim Nazirligi, Ukrayina Tış işler Nazirliginiñ ortaq teşebbüsinen ömürge keçirile", — dep haberde qayd etildi.
Hatırlatamız ki, 2025 senesi qara qış ayınıñ soñunda Kıyiv-Moğıla akademiyasında "Qırım platforması" teşebbüsi çerçivesinde Qırımtatar tetqiqatlarınıñ birinci qış mektebi çalışıp başladı.
Onıñ programması Qırım tarihı, qırımtatar tili ve edebiyatı boyunca fenlerara kurslarnı, yarımada işğaliniñ iqtisadiy ve ekologik kontekstlerindeki aqibetleriniñ talilini qaplap ala.
Bundan da ğayrı, 2025 senesi qara qış ayınıñ 14-nde Kıyivde "Global ukrayin studiyaları koalitsiyası" teşebbüsi çerçivesinde İşbirlik aqqında memorandum imzalandı. Teşebbüs dünya aliy oquv yurtlarında ukrayin ve qırımtatar tasiliniñ populârlaşmasına doğrultılğan.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
