Kıyivde "Ukrain studiyaları global koalitsiyası" teşebbüsi çerçivesinde işbirlik aqqında Memorandum imzalandı. Teşebbüs, dünya aliy oquv yurtlarında ukrain ve qırımtatarca studiyalarnıñ populârlaştırılmasına doğrultılğan. Ukrainada ve çetelde aliy tasil müessiselerinen işbirlik yapacaq İdare iş ofisi teşkil etilecek.
Ukraina prezidentiniñ tasil, ilim ve sport destegi fondunıñ meseleleri boyunca vekâletli mesleatçısı Olğa Budnık bunı bildirdi, dep Suspilne. Qırım mühbiri haber etti.
"Bugün alâ daa koalitsiyağa kirmek içün 50 çetel aliy oquv yurtundan ariza keldi. Olar içün farqlı iştirak formatlarını azırladıq. Ukraina studiyalarını yalıñız gumanitar yöneliş olaraq degil, milliy telükesizlik meselesi olaraq köremiz. Bizim içün Ukraina aqqında kerçek malümat bermek müimdir", — dep Budnık qayd etti.
Teşebbüs, işğal etilgen topraqlar boyunca Rusiye tarafından tarqatılğan yañlış malümatqa qarşılıq kösterüvge de diqqat ayıra. Ukraina prezidentiniñ Qırım Muhtar Cumhuriyetindeki daimiy temsilcisi Olğa Kurışko şunı qayd etti:
"Bütün bu yıllar devamında Rusiye Federatsiyası tarafından yapılğan ve çetel memleketlerde qullanılğan dezinformatsiyağa qarşılıq köstermek müimdir. Dünya Qırım aqqında, Qırım toprağında yaşağan, amma işğal sebebinden topraqnı terk etmege mecbur olğan tamır halqları aqqında daa çoq bilmesini isteymiz", — dep Ukraina Prezidentiniñ Qırım Muhtar Cumhuriyetindeki Daimiy Temsilcisiniñ vazifelerini vaqtınca eda etken Olğa Kurışko qayd etti.
Global teşebbüsniñ ayırılmaz bir parçası olacaq qırımtatar studiyalarınıñ inkişafına ayrı diqqat ayırıldı.
"Bizge qırımtatar studiyalarını çetelde ukrain studiyalarına kirsetmek pek müim. Bu, qurulışlı şekilde teşkil etilgende, universitetlerniñ institutsiya islâatına yol açacaq", — dep Ukraina institutınıñ baş müdiri Volodımır Şeyko qayd etti.
Ukrain studiyaları global koalitsiyası — ukrain studiyalarınıñ inkişafına doğrultılğan ve dünyada Ukraina ve onıñ ayırılmaz qısmı — Qırımnı ögrenüv yañı merkezlerini inkişaf ettirmek ve meydanğa ketirmek maqsadınen teşkil etilgen teşebbüs. Daa evel Ukrain studiyaları global koalitsiyasınıñ teşkil etilmesi Vaşingtonda keçirilgen konferentsiyada Birinci hanım Olena Zelenska tarafından ilân etilgen edi. O, Rusiye zapt etken ve anda repressiyalarğa oğrağan Ukraina tamır halqınıñ hatırasına qırımtatar studiyalarını teşkil etmek kerekligini qayd etti. Koalitsiyanıñ maqsadı — bütün dünya boyunca teşebbüs ve programmalarnı birleştirmek ve Ukraina tarihı ve medeniyetiniñ doğru ve ihtisasiy ögrenilmesini temin etmek içün ukrain, şu cümleden qırımtatar, studiyalarınıñ inkişafına yardım etmektir.
Telegram, WhatsApp ve Facebookta Suspilne Qırım haberlerine abune oluñız
