Kıyiv-Moğıla akademiyasında "Qırım platforması" teşebbüsi çerçivesinde birinci Qırımtatar studiyaları qış mektebi çalışıp başladı. Leyha "Qırım studiyaları" ilmiy-maarif merkezi tarafından teşkil etilgen ve qırımtatar halqınıñ tarihı, medeniyeti, tili ve zemaneviy kerçeklerini teren ögrenüvge doğrultılğan.
Qara qış ayınıñ 31-nde Suspilne Qırım mühbiri bu aqqında haber etti.
Merkezniñ reberi Martin-Oleksandr Kıslıy Suspilne Qırımğa mektepniñ programması Qırım tarihı, qırımtatar tili ve edebiyatı boyunca fenlerarası kurslarnı, em de yarımadanıñ işğaliniñ iqtisadiy ve ekologik kontekstlerindeki aqibetleriniñ talili olğanını ayttı.
İşğalden evel ve soñra Qırımnen bağlı halqara uquq, siyasiy ve içtimaiy ceetlerine diqqat ayırıla.
Onıñ bildirgenine köre, bu leyha Qırım mevzusında çalışqan alimler, içtimaiy faalciler ve studentlerniñ ğayretlerini birleştirmek içün meydançıq yarata. Ve tek bilgi toplamaq degil de, yañı tetqiqatlar yaratmaq içün degil.
Mektepniñ iştirakçisi, Taras Şevçenko adına Kıyiv milliy universitetiniñ studenti Darına Ğrığorçuk, Suspilne Qırımğa tefsirinde ukrain kimligini añlamaq içün qırımtatar tarihı ve medeniyetini ögrenmek müimligini qayd etti.
O qayd etti ki, qırımtatarlar — Ukrainanıñ ayırılmaz parçasıdır, olarnıñ ukrain tarihına qoşqan issesi ise tanılmalı. Bundan da ğayrı, olarnıñ Rusiye tarafından telükeler aqqında haberdar etüv tecribesi zemaneviy çağıruvlarnı añlamaq içün pek müim ola, dep student qoştı.
Uquq qorçalayıcı ve "QırımSOS" teşkilâtınıñ tesisçisi Alim Aliyev, qırımtatar studiyalarınıñ inkişafı ukrain bilgisiniñ dekolonizatsiyasınıñ esas elementi ola, dep qayd etti.
O, Ukraina "kolonial ve kommunistik rejimler tarafından bozulğan" unutılğan adlarnı ve tarihlarnı qaytarmalı, dep bildirdi. Bunıñ içün, Aliyevniñ fikirince, ocalarnıñ azırlanuvı ve oquv malzemeleriniñ azırlanuvınen birlikte tasil astyapısını qurmaq kerek.
Birinci Qış mektebi 150-den çoq ariza topladı, olardan 80 iştirakçi onlayn şekilde, 20 — oflayn şekilde oquy. Programmada 6 modül ve 24 auditoriya saati bar, bu ise 2 Avropa kredit-transfer sistemasınıñ (EKTS) kreditine teñ kele.
"Qırım studiyaları" Merkezi Qırım ve onıñ tamır halqlarını ögrenüvge bağışlanğan tasil ve ilmiy teşebbüslerni devam ettirmege ve bu saada halqara işbirlikni teşviq etmege planlaştıra.
Bu leyha, Ukraina birinci hanımı Olena Zelenskanıñ, hususan, Global ukrain studiyaları koalitsiyası ve Lisâk-Rudnıtskıy adına programma vastasınen desteklegen daa büyük teşebbüsniñ bir qısmıdır.
Telegram, WhatsApp ve Facebookta Suspilne Qırım haberlerine abune oluñız
