Qara qış ayınıñ 15-nde Poloniyada mahkeme, işğal etilgen Qırımda qanunsız şekilde qazma işleri yapqanında şübelengeni içün tevqif müddeti saban ayınıñ 4-ne uzatılğan rusiye arheologı Aleksandr Butâginniñ Ukrayinağa ekstraditsiyasına dair qara alacaq.
"Slawa TV" neşiri bu aqqında haber berdi.
Bu matbuat vastalarınıñ mahkeme jurnalistleriniñ bildirgenine köre, Butâginniñ imayecisi, onıñ peşin fikirligini bildirerek, mahkemecini deñiştirmege tırışa edi. Advokatlar qayd ettiler ki, bu mahkemeci Ukrayina vatandaşı Juravlövniñ Almaniyağa ekstraditsiyasına izin bermedi, bu sebepten imayeci taraf onıñ fikri peşin olğanını saya.
Evel bu matbuat vastalarınıñ mahkemeden bergen malümatına köre, Butâgin Qırımda 25 yıldan ziyade, şu cümleden Qırım işğal etilgen soñ da, qazma işleri yapqanını itiraf ete.
Amma, arheolog qabaatını tanımay, ekstraditsiya ihtimalini red ete ve Rusiye akimiyetinden qazma izinlerini alğanını bildire. Ukrayinadan böyle ruhsetname almağa tırışmadı.
Şimdi mahkeme saat 15:00-ke qadar teneffüske çıqtı.
Aynı zamanda Rusiye Tış işler nazirligi, RFdaki Poloniya elçisi Kşıştıf Frayevskıynı yanına çağırdı ve Kıyivniñ ricasınen Butâğinniñ teiqifi sebebinden oña "qararlı razısızlıq" bildirdi.
İlk qış ayınıñ 4-nde Felemenkten Poloniya üzerinden Balkanlarğa ketkende Rusiye arheologı Aleksandr Butâgin Poloniya mahsus hızmetleri tarafından tutuldı. Poloniya kütleviy haber vastalarınıñ malümatına köre, o, Poloniya prokurolığında ifade bermekten vazgeçti. Onı 40 künge apiske aldılar.
İlk qış ayınıñ 23-nde Ukrayina resmiy şekilde Poloniyağa, işğal etilgen Qırımda qanunsız qazma işlerinen oğraşqanında şübelengen ve Varşavada tutulğan Rusiye arheologı Aleksandr Butâginniñ ekstraditsiyası aqqında muracaat yolladı.
2022 senesi Rusiye arheologı Aleksandr Butâgin işğal etilgen Qırımnıñ Keriç civarındaki qadimiy Mirmek şeerinde qazma yapqanda, Rusiyege çıqarılğan Aleksandr Makedonskiy zamanına ait 30 para hazinesini taptı. Onıñ fiyatı 8,5 million ğrıvnâdan ziyadedir. İşğal etilgen Ukrayinada qanunsız çalışqanı içün şübelendi.
Qırım Muhtar Cumhuriyeti prokurorlığı Suspilne Qırımğa Butâginniñ dava açılğan bir qaç arheologdan biri olğanını bildirdi: umumen yedi şübheli, olarnıñ arasında Qırımdaki qazmalarda iştirak etken em Rusiye, em de Ukrayina vatandaşları bar. Qırımnıñ Rusiye arheologları tarafından nasıl zapt etilgeni aqqında tafsilâtlıca malümatnı maqalede oquñız.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
