Qara qış ayınıñ 12-nde Ukrayina Ukrayin siyasiy mabüsi kününi qayd ete. Bu hatıra künü 1975 senesi sovet rejiminiñ repressiyaları ve zulumına qarşılıq köstermege çağırğan ukrayin siyasiy faalcisi ve dissidenti Vâçeslav Çornovolnıñ teşebbüsinen tesis etildi.
Ukrayina prezidentiniñ Qırım Muhtar Cumhuriyetindeki temsilciligi bunı bildirdi.
1972 senesi qara qış ayınıñ 12-14 künleri sovet akimiyeti "ukrayin ziyalılarını yoq etüv ekinci dalğası"nı keçirdi, bu da altmışıncılar areketiniñ inkişafını toqtattı. O vaqıt Lviv ve Kıyivde İvan Svitlçnıy, Vasıl Stus, Vâçeslav Çornovol ve ukrayin medeniy ve uquq qorçalayıcı cemaatınıñ diger vekilleri yaqalandı.
1972-1974 seneleri sovet cezalandıruv organları yüzlernen tintüv keçirip, aman-aman 200 insannı "sovetlerge qarşı teşviqat" ve diniy sebeplerden qabaatlap apiske aldı.
Prezidentniñ Temsilciligi qayd ete ki, bugün Rusiye sovet rejiminiñ siyasetini taqip ete, şu cümleden vaqtınca işğal etilgen topraqlarda, hususan Qırımda, qanunsız tintüvler, tutuvlar ve siyasiy taqiplerni keçire. 2026 senesi qara qış ayınıñ başında işğalli akimiyet qanunsız sürette 224 insannı apiske aldı, olardan 133-ü — qırımtatar.
Olarnıñ arasında eñ qart Qırım siyasiy mabüslerinden biri olğan Ğalına Dovğopola bar, onı Rusiye mahkemesi "devlet hainligi" ve "Ukrayina istihbaratınen işbirlik yapqanı" içün umumiy rejimli müstemlekede 12 yılğa üküm etti. Rusiye apishanesinde 12 yılğa mahküm etilgen Qırım sakini Tofik Abdulgaziev de buluna. Apishanede bulunğanda, oña metastazlı bir beyin şişigi diagnozı qoyuldı, körügi aman-aman bütünley ğayıp oldı, aqciger ve miy tüberkülozına oğradı. Bundan da ğayrı, Rusiye apishanesinde sert rejimli müstemlekede 15 yılğa mahküm etilgen Qırım ressamı ve faalcisi Boğdan Ziza qala.
Ukrayina siyasiy mabüsi kününe bağışlanğan tedbirde prezident ofisiniñ yolbaşçısı Kırılo Budanov qayd etti ki, Rusiyede rejimlerniñ adları deñişe, amma usul deñişmey — Moskva siyasetiniñ aleti olğan apishane. Onıñ aytqanına köre, ukrayina siyasiy mabüsleri cinayetleri içün degil de, kimligi, tili, işğalni qabul etmemesi ve devletine sadıqlığı içün taqip etileler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
