Qırım siyasiy mabüsi Tofik Abdulaziyevniñ apayı onıñ Rusiyeniñ Çelâbinsk şeerindeki apishanede alı kritik olğanını bildirdi. Adamnıñ beyindeki zararlı şişik diagnozı qoyuldı, şimdi ise o, sıq-sıq esini coya ve nefesi tutula. Qadın onıñ deral azat etilmesini talap ete.
Siyasiy mabüsniñ apayı Aliye Kurtametova Facebookta bu aqqnda yazdı.
Onıñ sözlerine köre, soñki telefon subeti vaqtında Tofik Abdulgaziyev, esini coymağa başlağanı sebebinden hastahaneniñ bir kişilik kamerasındaki yataq yanında olmağa tırışqanını bildirdi. Bundan da ğayrı, o qayd etti ki, aqayınıñ nefesi sıqça tutula — zornen nefes ala.
"Böyle bir şeyni eşitmek ve yalıñız izolâtorda bulunğanını ve tüşse, yardım etecek kimsesi olmağanını añlamaq — dayanılmaz. Birden başı urulacaq? Ya birden boğulacaqmı? Uzun raatlıq künleri sebebinden ekimlerge muracaat etip, tedaviylev ya da aqayımnıñ alı aqqında soramaq imkânım yoq. Vaqıt toqtadı, ve aqayımnen er bir subetim soñki lafım kibi ola. Bizim içün er bir telefon subeti ava kibi ola, bazıda bütün sözler menim boğazımda qala, ve men onı bir şeyge celp etmek içün kerekli sözlerni tapıp olamayım. Er kesni aqayımnen olğan vaziyetke diqqat etmege rica etem. Tofik Abdulgaziyev evde olmalı. Vaqıt bizge qarşı çalışa. Aqayımnıñ apisten azat etilmesini talap etem", — dep qadın yazdı.
Hatırlatamız ki, 2019 senesinden berli Rusiye tarafından uydurılğan "Hizb ut-Tahrir davası" boyunca qanunsız şekilde tutulğan Qırım siyasiy mabüsi Tofik Abdulgaziyevniñ beyindeki zararlı şişik diagnozı qoyuldı. Adamnıñ ameliyatı ve himioterapiyası planlaştırıla, Rusiye ekimleri ise ayttılar ki, onıñ yahşı olacağına iç bir kefalet bermeyler.
Qırım siyasiy mabüsi Tofik Abdulgaziyevniñ advokatları mahkemege onı sağlıq alı sebebinden azat etmege talap etip muracaat ettiler. Mahkeme oturışınıñ vaqtı aqqında malümat beklenile.
Bundan evel onıñ apayı ve advokatı, hastalığı sebebinden onı apis cezasından azat etmege talap ettiler. 2024 senesi arman ayında mahkeme bunı red etti.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
