Cenkke qarşı narazılıq sebebinden 15 yılğa mahküm etilgen Qırım siyasiy mabüsi Boğdan Ziza Rusiye vatandaşlığından vazgeçti. O, Rostovdaki mahkeme oturışında Rusiye pasportını qullanmağa istemegenini açıqtan bildirdi.
Siyasiy mabüsniñ qardaşı Oleksandra BarkovaSuspilne Qırımğa bu aqqında tarif etti.
Oleksandranıñ aytqanına köre, Boğdan Ziza Rostovdaki mahkeme oturışında Rusiye pasportından vazgeçti.
"Boğdan da Rusiye vatandaşlığından marum etildi, amma bu onıñ ricası edi. O, bu esnasnı Rostovdaki mahkemeden başladı, soñki mahkeme oturışında o, Artem Loyik yırından satırlar oqup, rus tilinden vazgeçkenini ayttı. Anda o, oña vatandaşlığından marum etmege rica etti", — dep onıñ qardaşı bildirdi.
O añlattı ki, onıñ içün bu adım timsaliy ve printsipial edi.
"Vatandaşlıq mecburiy, Rusiye pasportı da mecburiy, çünki o işğal etilgen Qırımda qaldı", — dep Oleksandra qayd etti.
Barkovanıñ aytqanına köre, qorantası tez deñiştirüv olacağına ümüt ete.
"Ümüt etemiz ki, eger de onı Rusiye vatandaşı olaraq tanımağan olsalar, onı tezce qaytarırlar. Rusiye Qırım sakinlerini öz vatandaşları olaraq sayğanı içün qaytarmağa red ete", — dep qoştı o.
Onıñ aytqanına köre, vatandaşlıqtan marum etüv ketişatı uzun sürdi.
"O, arizanı advokat vastasınen yazdı, ve ariza bayağı vaqıt baqıldı. Men añladım ki, o bir kere bile yazmadı, bir qaç kere muracaat etti", — dep Oleksandra qayd etti.
Boğdan Zizanıñ ukrayin vesiqalarına kelgende, onıñ qardaşı, apiske alınmazdan evel tintüv vaqtında Rusiye quvetçileri onıñ ukrayin pasportını tutıp alğanlarını añlattı.
"Onıñ Ukrayina pasportı apiske alınmazdan evel tintüv vaqtında alındı. Onı alıp ketkenler. Onı odasında saqlay edi", — dep Barkova qayd etti.
Bundan da ğayrı, o ayttı ki, Rusiye vatandaşlığından vazgeçüv oña müstemlekede mesele yaratmay. Aynı vaqıtta o bildirdi, qardaşınıñ sağlıq vaziyeti qasevetlendire.
"Şimdi sağlıq meselesi bar, amma bunı al etmege tırışamız. Umumen alğanda, vaziyet daa beter oldı. Tabiiy ki, tibbiy yardım aman-aman yoq", — dep Oleksandra yekünledi.
Boğdan Ziza aqqında ne bilemiz
2022 senesi mayıs ayınıñ 20. künü qırım ressamı ve faalcisi Boğdan Zizağa qarşı "terror aktını yapmağa ıntıluvı" aqqında cinaiy dava açıldı. Onı şübeleyler ki, mayıs ayınıñ 16. künü işğalli şeer memuriyetiniñ binasını boyanen boyaladı ve onı yaqmağa tırışqan.
Bozarğan aynıñ 6. künü Rostov-na-Donudaki Cenübiy bölge arbiy makemesi qırım ressamı ve faalcisi Boğdan Zizanı 15 senege maküm etti.
Bozarğan aynıñ 10. künü Ziza açlıq ilân etti. O, rusiye vatadaşlığından marum etmesini ve ukrain siyasiy mabüslerini azat etmesini talap etti. Bozarğan aynıñ 27. künü açlıq çekmege bitirdi.
Ukrain repçisi Artem Loik, 15 senege maküm etilgen ressam ve faalcini destek etmek içün video çıqardı, çünki Ziza soñ sözüni aytqanda repçiniñ "Krıla" ("Qanatlar" - terciman) yırından sözlerni qullandı.
Qırımda apis etilgen Kezlevli ressam Boğdan Zizanıñ şerefine ukrain ressamları trenni resimlernen yaraştırdılar.
2023 senesi berim ayınıñ 27. künü Vlasıha şeerindeki Arbiy apellâtsiya makemesi, qırım ressamınıñ 15 senelik ükümini deñiştirmeyip qaldı.
Boş aynıñ 12. künü siyasiy mabüsniñ mektüp dostu ondan mektüp alıp haber berdi ki, Boğdan Ziza Perm şeeriniñ 29. müstemlekesine etap etile. Bundan evel arqabaları, etap devrinde qayda bulunğanını bilmegen ediler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
