"Hizb ut-Tahrir davasında" qanunsız sürette 13 yıl apis cezasına mahküm etilgen 57 yaşındaki qırımtatar siyasiy mabüsi Yaşar Muyedinovnı Rusiyeliler belli olmağan sebeplerden sebepler ile Arhangelsk vilâyetiniñ Koryazma şeerindeki №5 tahqiqat koloniyasından Arhangelskniñ №4 tahqiqat izolâtorına alıp kettiler.
"Qırım birdemligine" onıñ qadını Nailâ İbragimova bu aqqında ikâye etti.
Onıñ aytqanına köre, 2025 senesi ilk qış ayınıñ 31-nde qırımtatarı qorantasına telefon etip, SİZOda bulunğanını bildirdi. Muyedinovnıñ tahminlerine köre, izolâtorda eki afta qalacaq. Bundan soñ mayyalar kene de koloniyağa qaytarılacaq.
"O, özüni yahşı duya, sağlığından şikâyet etmey edi", — dep Yaşar Müedinovnıñ apayı tarif etti.
Siyasiy mabüsniñ koloniyadan tahqiqat izolâtorına ne içün avuştırılğanı belli degil.
2024 senesi qural ayında Muyedinov qanunsız etap vaqtında onı köteklegenleri aqqında şikâyet etti. Bundan da ğayrı o, rusiyelilerniñ ruhiy basqısını tasdıqladı.
2024 senesi ekim ayında siyasiy mabüs sağlıq problemleri — qollarında şiddetli ağrılar ve ayaqlarında şişmeler — ve tibbiy yardımnıñ yoqluğını qayd ete edi.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
