Qırımdaki siyasiy mabüs Tofik Abdulgazievniñ advokatları, oña beyin şişesi qoyulğanını aytqanda, mahkeme tarafından onıñ sağlıq alı sebebinden azat etilmesini talap etip, muracaat berdi. Mahkeme oturışuvınıñ vaqtı aqqında malümat beklenile.
"Qırım birdemligine" advokat Emil Kurbedinov bu aqqında bildirdi.
"Şimdi biz kene Çelâbinsk vilâyetiniñ mahkeme sistemasına muracaat etip, işten boşatılmaq içün muracaat ettik. Bir sıra tıbbiy malümat bar, şu cümleden koloniya müessiselerinden. Onı rayon hastahanesine alıp kettiler, anda bir konsilye toplandı, ve o vaqıt olğan pek ağır diagnozlar tasdıqlandı. Dava mahkemege berildi. Şimdi mahkeme toplaşuvınıñ keçirilmesini bekleymiz, em Tofik Abdulgazievniñ apishanesinde, em de bu künlerde ve aylarda teşkerilgen tibbiy müessiselerde bütün bu neticelerniñ berilmesini bekleymiz. Ümüt etemiz ki, mahkeme kerçek vaziyetni körer ve müsbet qarar alacaq, ve bu insan mında, Qırımda, evde qalmalı", — dep haberde aytıla.
Onıñ aytqanına köre, siyasiy mabüsniñ alı pek fenalaşa — hususan, o, körligini ğayıp etmege az qaldı.
"Şunı aytsaq, abartmayım: bu esap tam olaraq künlerge kete, ve o anda qalmamalı. Şunıñ içün şimdi mahkeme oturışuvını bekleymiz, em de Rusiye Federatsiyasınıñ insan aqları vekâletlisinden ve muracaat etken yerli akimiyetten cevap bekleymiz, ve bu esnasnıñ ilerideki ketişatı aqqında haber etecekmiz. Tofik ile bağlı vaziyetke kelgende, kerçek vaziyet böyle", — Kurbedinov dedi.
Hatırlatamız, ekimler şurası Abdulgazievniñ miyindeki şişniñ zararlı olğanını qayd etti. Bunı "Qırım birdemligine" siyasiy mabüsniñ apayı Aliye Kürtametova bildirdi.
Qadın, ilk qış ayınıñ başında MRT yaptırğanını ayttı. Ekimler, evel menfiy olğan, yani zararlı üceyrelerniñ olmağanını köstergen onkomarkerler içün testlerni aldılar. Lâkin, Aliye Kürtametovanıñ qayd etkenine köre, o vaqıt, ince mütehassıslarnıñ neticeleri olmasa, bu malümat doğru degil edi.
Tek belli olğan bir şey, beyindeki deñişmeler glioblastoma olğanını kösterdi. Neyrohirurg Abdulgazievni ve bugünki konsiliumnı baqqan soñ ekimler, şişniñ zararlı olğanını añladılar.
"Menim añlatqanıma köre, şişniñ bir qısmı biraz uzana. İşte bu yerni ameliyatnen alıp taşlamağa planlaştıralar. Amma ekimler normal tiklenüv içün iç bir şans bermeyler", — dep Aliye Kürtametova qoştı.
2024 senesi saban ayından berli qırımtatarı hastahanede buluna. Oña sıq tarqalğan aqcigerler tüberküloz hastalığı diagnozı qoyuldı.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
