2019 senesinden berli Rusiye tarafından uydurılğan "Hizb ut-Tahrir davası" boyunca qanunsız sürgün etilgen Qırımlı siyasiy mabüs Tofik Abdulgaziyevniñ beyininde şiş teşkerildi. Erkekniñ ameliyatı ve himioterapiyası planlaştırıla, Rusiye ekimleri ise, onıñ sağ qalmasına iç bir garantiya berilmey, dep bildirdi.
"Qırım birdemligine" onıñ apayı Aliye Kurtametova bu aqqında ayttı, video Facebookta derc etildi.
7 yıl devamında apishanede tutuldı, dep onıñ apayı Aliye Kurtametova tarif ete. Bu vaqıt içinde o, apiske alınmazdan evel 100 kilogrammğa yaqın olğanından 48 kilogrammğa azlaştı ve ağır hronik hastalıqlarğa oğradı.
2023 senesi saban ayında aqcigerinde problemalar olğan soñ, qadını aqayını hastahaneden çıqqan soñ kördi. O, advokatınen beraber aqayını hastalığı sebebinden apis cezasından azat etmege talap etti, lâkin 2024 senesi arman ayında Rusiye mahkemesi bu aqqında red etti.
"Boş ayınıñ soñunda o telefon etip, körüniñ birden ğayıp olğanını ayttı. Sebebi, çoq vaqıt bir kişilik kamerağa qapatılğanı ve anda yeterli derecede yarıq olmağanı, ve şeker hastalığı diagnozı qoyulğanı, dep tüşündik. Amma oftalmolog bunıñ sebebi beyinge bağlı olğanını ayttı", — dep qadın hatırlay.
İlk qış ayınıñ 1-nden berli Çelâbinsk apishanesinde buluna. Bir qaç kün evelsi, ekimler keñeşinde, oña beyinde zararlı bir şiş diagnozı qoyulğanı belli oldı. Qırımlı siyasiy mabüsniñ nevbetteki teşkerüvi, acele ameliyat ve himioterapiya olacaq.
"Doktordıñ aytqanına köre, onıñ şiş bar eken, tek şındıqta ğana emes. Onı Çelâbinsk onkologiya hastahanesine yolladılar. Tam bir teşkerüvni bekleyim — onı maña ekimler yollamalı. Olarnıñ aytqanına köre, şiş, beyne içinde yerleşe ve oña irişmege qıyın. Adamğa, sağ qalması içün kefalet yoq, dediler. Çünki bu pek qıyın bir ameliyattır. Ekimler, tümörniñ bir qısmını alıp taşlaycaqlarını, teleradioterapiya ve himioterapiya kursını bereceklerini ayttılar", — dep Aliye Kurtametova tarif etti.
Rusiye ekimleriniñ aytqanına köre, daa evel teşkerilmegen beyin tuberkulozi sebebinden beyne onkologik zarar körgen, dep siyasetşınasnıñ apayı bildire.
"Biz 16 yıl evli edik, ve er kün onıñ ne qadar küçlü ruhlu, adaletli ve namuslı insan ve ne qadar dindar bir musulman olğanına şaşıp turacam. Er bir sınavnı, atta qorqunç hastalıqnı o Allahqa ümüt etip, tebessüm ile qarşılay", — dep qadın qoştı.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
