Ukrayina Silâlı quvetleriniñ insansız sistemalar quvetleri (İSQ) işğal etilgen Qırımnıñ Ğvardiyske şeerindeki radiolokatsiya stantsiyasını (RLS) urdı.
İlk qış ayınıñ 2-nde İSQ Facebook saifesinde bu aqqında haber etti.
İSQ qoştı ki, ukrayin ücümi sebebinden bozulğan sistema Rusiye arbiy hızmetçileriniñ ava boşluğını nezaret etüvini temin ete edi.
Bu RLSnıñ tam olaraq ne vaqıt zarar körgenini aytmadılar.
Bundan evel Ukrayina Mudafaa nazirliginiñ Baş istihbarat idaresi işğal etilgen Qırımda Rusiye ava mudafaası, aviatsiyası, flotu ve diger 2025 senesi maqsatlarnıñ yoq etilmesiniñ "tarihiy kadrları"nı kösterdi. Bİİniñ "Prımarı" mahsus bölüginiñ askerleri bu operatsiyalarnı kerçekleştirdi.
Qara qış ayınıñ 1-nde işğal etilgen Qırımnıñ Kerç şeerinde patlavlar oldı. Rusiye Mudafaa nazirliginiñ malümatına köre, yarımadanıñ üzerinde AMS 13 dronnı tüşürdi.
Hatırlatamız ki, Yañı yıl gecesi Ukrayina SQniñ insansız sistemalar quvetleriniñ ücüm dronları Rusiyeniñ vaqtınca işğal etilgen topraqlardaki, hususan Qırımdaki, arbiy ve astyapı obyektlerine ücüm etti.
Zarar körgenler arasında Ğvardiyske arbiy ava limanı yanındaki radiolokatsiya obyektleri bar, dep USQniñ komandanı Robert Brovdi ("Madâr") bildirdi.
İşğal etilgen Qırımnıñ Olenivka civarında Rusiye ordusınıñ 92-nci özen katerleri brigadasınıñ yüzüci bazaları zarar kördi, em de ST-68 tipindeki üç koordinatlı radiolokatsiya stantsiyası yoq etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
