Qara qış ayınıñ 1-nde işğal etilgen Qırımnıñ Keriç şeerinde patlavlar yüz berdi. Rusiye Mudafaa nazirliginiñ malümatına köre, yarımadada ava mudafaası sisteması (AMS) 13 dronnı urdı.
Rusiye mudafaa nazirligi Telegram kanalında bunı bildirdi.
Nazirlik qoştı ki, Moskva vaqtına köre, saat 8:00-den 16:00-ğa qadar nevbetteki AMS vastaları Rusiye toprağı, Qırım ve Tataristan Cumhuriyeti üzerinde 58 dronnı toqtatıp yoq etti. Aynı zamanda, Azaq deñizi üzerinde 58 drondan 10 dron tüşti.
Aynı vaqıtta yerli sakinler "Qırım yeli" Telegram kanalına bildirdiler ki, tahminen saat 13:11-de Keriçte "şiddetli patlav" eşitildi. Umumen 15 patlav qayd etildi.
Bundan soñ, saat 16:37-de şaatlar şeerde daa dört-beş patlav olğanını bildirdiler.
Hatırlatamız ki, Yañı yıl gecesi USQniñ insansız sistemalar quvetleri Rusiyeniñ vaqtınca işğal etilgen topraqlardaki, şu cümleden Qırımdaki, arbiy ve astyapı obyektlerine ücüm etti.
Zarar körgen obyektler arasında Ğvardiyske arbiy ava limanı yanındaki radiolokatsiya obyektleri bar, dep İSQniñ komandanı Robert Brovdi ("Madâr") bildirdi.
İşğal etilgen Qırımnıñ Olenivka civarında Rusiye ordusınıñ 92-nci özen katerleri brigadasınıñ yüzici bazası zarar kördi, em de ST-68 tipindeki üç koordinatlı radiolokatsiya stantsiyası yoq etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
