Eki kündir işğal etilgen Qırımda ardı-sıra A92 ve A95 benzinleri yoq. Yaramay ava sebebinden Keriç boğazında keçitniñ işi toqtatılğanı içün bu qıtlıq peyda oldı.
İlk qış ayınıñ 30-nda #LiberateCrimea cemaat teşebbüsiniñ faalcisi "Qırım.Aqiqat"qa anonimlik şartınen bu aqqında tarif etti.
"Keriç boğazından keçitniñ işini toqtatılır-toqtatılmaz, Qırımnıñ benzin stantsiyalarında benzin yoq oldı. Bu, yarımadada iç bir kütleviy yedek, hususan benzin olmağanını tasdıqlay", — dep o ayttı.
Faalciniñ aytqanına köre, mesele tek işğalki akimiyetniñ ihmalinde degil de, yarımadada "aman bütün yaqarlıq anbarlarını yoq etken" Ukrayina arbiy silâlı quvetlerniñ neticelerinde de bar.
Daa evel "Strategiya XXI" globalistika merkeziniñ havfsızlıq programmalarınıñ reberi Pavlo Lakiyçuk bildirdi ki, Ukrayinanıñ işğal etilgen Qırımdaki neft bazalarına ücümlerinden soñ yarımadada yaqarlıq fiyatları artacaq ve onıñ teminatı ve saqlanuvınen meseleler peyda olacaq.
Hatırlatamız ki, orta küz ayınıñ 17-nden itibaren işğal etilgen Qırımda benzin stantsiyalarınıñ çoqusından tek benzin degil, dizel yaqarlığı da ğayıp oldı. Ğaliba bunıñ sebebi aynı şu künü ukayin arbiy hızmetçileriniñ Ğvardiyskedeki neft bazası ve yaqarlıq yedeklerine ücümleri oldı.
"Sarı şerit" narazılıq areketiniñ bildirgenine köre, rusiyeliler işğal etilgen Qırımğa benzinniñ bozulğan yollarını bere başladılar. Maşnalar 95 benzinnen toldurılğan soñ, motorlar sessiz qala ve birinci kere çalıştırılmay.
Orta küz ayında işğalli akimiyet rus arbiy hızmetçilerine prioritet berip, vatandaşlarğa yaqarlıq berilmesini sıñırladı. Yerli sakinler tek qıtlığından degil de, benzinniñ keyfiyetsizliginden de şikâyet ete ediler: yaqarlıqnıñ boyağa oşağan keskin qoqusı bar, benzin toldurılğan soñ maşnalar sessiz qalıp, çalışmağa zorlana.
Bu qıtlıq sebebinden benzin hırsızlavı ve musadere etilüvi bayağı arttı: benzinni park etilgen maşnalardan tökmege başladılar, aydavcılar benzin nevbetinde ya da qorquzuvlar altında benzin aluvı aqqında bildireler.
Tış istihbarat hızmeti, 2025/2026 qışında benzin qıtlığınen bağlı buhrannıñ daa da beterleşecegini tahmin ete. Bu vaziyet, ilk evelâ, Qırım ve öz neft istisalcılıq qabiliyetleri olmağan ve Rusiye Federatsiyasından ketirilgen cermayğa bağlı olğan diger işğal etilgen topraqlarğa tesir etecek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
