Neft bazasına ücümden soñ Qırımdaki benzin stantsiyalarında dizel yoq oldı

Orta küz ayınıñ 17-nden başlap işğal etilgen Qırımda çoqusı benzin stantsiyalarından tek benzin degil de, dizel yaqarlığı da yoq oldı. Ğaliba, bunıñ sebebi — aynı şu künü Ukrayina arbiy hızmetçileriniñ Ğvardiyskedeki (SarabuzRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addaki) neft bazaları ve yaqarlıq yedeklerine zarar ketirmeleri oldı.

#LiberateCrimea kampaniyasınıñ Qırım faalcisi "Qırım.Aqiqat" saytına anonimlik şartınen bu aqqında añlattı.

"Bu, Ğvardiskeniñ neft bazasını ve yaqarkıq anbarlarını muvafaqiyetnen urıp keçken soñ oldı, belli ki, bu, yaqarlıq yedekleri edi. Cuma sabasından bugüngece (orta küz ayınıñ 19-na qadar — muar.) Ğvardiyske tarafında büyük duman tura, o, atta Zoydan (20 km uzaqlıqta — muar.) körüne. Bu sebepten, Qırımnıñ Rusiye yolbaşçısı Sergey Aksönovnıñ yaqarlıq teminatınen bağlı vaziyetni tınçlandırmaq vadeleri amelge keçirilmey", — dep qayd etti o.

Orta küz ayınıñ 19-nda işğalli Qırım akimiyeti bildirdi ki, yaqarlıq satılğan stantsiyalarnıñ sayısı qat-qat arttı. Olarnıñ malümatına köre, 89-93 benzin stantsiyası oldı. Amma derc etilgen cedvellerde körüne ki, çoqusı benzin stantsiyalarında 1 ya da 2 yaqarlıq çeşiti qayd etile. Em de ne qadar yaqarlıq bar olğanını aytmay.

İşğal etilgen Aluştada benzinni tek üç benzin stantsiyasından almaq mümkün, dep işğalli memuriyetiniñ "başı" Galina Ogneva bildirdi. Onıñ malümatına köre, daa üç benzin stantsiyasında yanğın çıqa bile. Oktâbrniñ 18-nde Sakarda yaqıt tek bir benzin stantsiyasında ve tek AI-95 markalarında satıla edi.

Hatırlatamız ki, Ukrayina mahsus operatsiyaları quvetleri orta küz ayınıñ 17-ne keçer gecesi işğal etilgen Qırımda "Ğvardiyske" kombinatınıñ ve neft bazasınıñ zarar körgenini tasdıqlad ı.

Evel "Sarı şerit" qarşılıq areketi, ruslar işğal altındaki Qırımğa benzinniñ eksik partiyalarını ketirgenlerini bildirdi. Maşnalar 95 benzinnen toldurılğan soñ, motorlar sessiz qala ve birinci kereden köçürilmey.

Orta küz ayından itibaren işğalli akimiyet rusiye arbiy hızmetçilerine ziyade vatandaşlarğa yaqarlıq berilmesini sıñırlay. Yerli sakinler tek qıtlığından degil de, benzinniñ keyfiyetsizliginden de şikâyet eteler: yaqarlıqnıñ boyağa oşağan keskin qoqusı bar, benzin toldurılğan soñ maşnalar sönüp, onı köçürmek zor ola.

Bu qıtlıq sebebinden benzin hırsızlavı ve musadere etilüvi bayağı arttı: benzinni park etilgen maşnalardan tökmege başladılar, aydavcılar benzin nevbetinde ya da qorquzuvlar sebebinden benzin alğanlarını bildireler.

Tış istihbarat hızmeti 2025/2026 seneleri qışta benzin qıtlığınen bağlı vaziyetniñ kerginleşmesini tahmin ete. Bu vaziyet, ilk evelâ, Qırım ve öz neft istisalcılıq imkânları olmağan ve Rusiye Federatsiyasından ketirilgen neftke bağlı olğan diger işğal etilgen topraqlarğa tesir eter.