Ukrainlerniñ çoqusı Ukrayinanıñ vaqtınca işğal etilgen topraqlarınıñ (VİET) statusınen bağlı er angi añlaşmalarnı qabul etilmez dep sayalar.
2025 senesi ilk qış ayınıñ 5-16 künleri "Demokratik teşebbüsler" Fondu Razumkov Merkezinen beraberlikte keçirgen Bütünukrayin soravınıñ neticeleri bunı tasdıqlay.
Amma 13%-i böyle bir stsenariyge razı olacaq. Daa 11%-i cevap bermedi.
Tedqiqatta Ukrayina devleti nezaretindeki topraqlarda yaşağan 18 yaşından büyük 2 biñ Ukrayina vatandaşı iştirak etti.
Aynı vaqıtta Qırımtatar resurs merkezi qayd etti ki, cenkniñ bitirilmesi aqqında esas vesiqanıñ birinci maddesi olaraq qayd etilgen Ukrayina suverenitetiniñ printsipi Qırım ve diger VİETlarnıñ statusınen bağlı er angi añlaşmanı istisna ete.
"Olarnı ayırmaq ya da statusını deñiştirmek kibi yanaşmalar halqara uquqqa zıt kele ve bütün dünya içün telükeli bir örnek teşkil ete", — dep uquq qorçalayıcılar qoştılar.
Daa evel BMTnıñ Baş Assambleyası Ukrayinanıñ vaqtınca işğal etilgen topraqlarında, şu cümleden Qırımda, insan aqlarınıñ bozuluvı aqqında yañartılğan rezolütsiyanı qabul etti. Vesiqağa 79 memleket qol tuttı. Rezolütsiya Rusiye Federatsiyasınıñ istilâsını takbih ete ve Rusiye ordularınıñ çıqmasını talap ete.
Hatırlatamız ki, Avropa İnsan aqları mahkemesi (AİAM) Qırımda bozuvlarnen bağlı 1100-den ziyade şikâyetni baqa. Bu, şahsiy insanlarnen bağlı şahsiy davalardır. IV-nci "Qırım platforması"nıñ ihtisasiy ağınıñ halqara forumı devamında Avropa mahkemesiniñ vekâletlisi Marğarıta Sokorenko bunı bildirdi.
Bundan evel Avropa mahkemesi, Rusiyede ve işğal etilgen topraqlarda, hususan Qırımda, cenkke qarşı nazar noqtası içün yapılğan repressiyalarnı insan aqlarınıñ bozuluvı olaraq tanıdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
