Avropa insan aqları mahkemesi Qırımdaki bozuvlarnen bağlı 1100-den ziyade şikâyetni baqa. Bu şahsiy davalar, şahsiy insanlarnen bağlı davalar.
"Qırım platforması" ihtisasiy ağınıñ IV. halqara forumında Suspilne Qırımğa bergen izaatında Avropa mahkemesiniñ vekâletlisi Margarıta Sokorenko bunı bildirdi.
"Biz şahsiy davalar aqqında aytsaq, olar belli bir insannı, belli bir hususiyetni közde tuta. Statistik malümatlarğa kelgende, Ukraina Qırımnen bağlı eki devletlerara davası aqqında aytamız. Olar 2014 senesinden başlap olğan müddetni qaplap alalar. Şahsiy davalar er kün baqıla, demek ki, daa çoq", — dedi o.
O şunı da hatırlattı ki, 2014 senesi Qırım işğalindan soñ Ukrayina Adalet nazirligi Avropa insan aqları mahkemesine işğal etilgen Qırımda insan aqlarınıñ, hususan mülkniñ barışıqlı saipligi aqqınıñ bozuluvı sebebinden devletlerara dava açtı.
"Bizde eki qarar bar. Birincisi, 2021 senesinden başlap. Bu basamaqta, Rusiye Qırımnı küç qullanıp zapt etkenini ve onı nezaret etkenini isbatladıq. 2014 senesi kiçik qış ayından berli Rusiye Qırım territoriyasını qanunsız şekilde zapt etkenini ve o vaqıttan berli insan aqlarını bozğanını isbatladıq. Bu, Avropa mahkemesiniñ müim qararı ve qararları ile orta, amma pek müim bir basamaq edi. Ekinci qarar ise 2024 senesi iyün ayında qabul etildi. Mında Avropa mahkemesi insan aqlarınıñ bozuluvı siyaseti ve bu bozuluvlarnıñ sistematik örnekleri bar olğanını qayd etti", — dedi Sokorenko.
İşlengen cinayetlerniñ çoqusı devamlı ola — aynı bir cinayet daa çoq vaqıt devamında yapıla. Adet üzre, bunıñ içün aynı bir şahıslar mesüliyetlidir, dedi Truth Hounds uquq müdiri Zera Kozlıyeva.
"Kerçekten de, 2014 senesinden başlap bugünge qadar bozuvlarnıñ bütünligi ve devamını, em de olarnıñ muntazamlığını köstergenimizde, eñ yüksek memurlarnıñ mesüliyetke çekilüvi aqqında ayta bilemiz. Çünki bu devlet tarafından muayyen vazifelerni eda etken şahıslar vastasınen amelge keçirilgen devlet siyaseti meselesi ola. Ve mında biz em ayrı memurlarnıñ, em de umumen devletniñ cinaiy mesüliyeti aqqında ayta bilemiz", — dep Kozlıyeva qayd etti .
Hatırlatamız ki, Qırımtatar resurs merkeziniñ malümatına köre, 2025 senesi oran ayına qadar Rusiyeniñ apishanelerinde işğal etilgen Qırımdan 260 siyasiy mabüs tutula, olardan 15—ü — tamır qırımtatar halqınıñ temsilcisi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
