16,5 yılğa mahküm etilgen qırımtatar siyasiy mabüsi Teymur Abdullayev kene Rusiye müstemlekesiniñ ceza izolâtorına yerleştirildi. Anasınıñ aytqanına köre, bu, onıñ nezaretçilerni teşkergende namazını toqtatmağanı sebebinden oldı. Abdullayev ilk qış ayınıñ 16-ndan berli ŞİZOda buluna.
Onıñ anası Dilâra Abdullayeva Facebookta bunı bildirdi.
"Olar (nezaretçiler — muar.) namaznı toqtatmaq mümkün olmağanını añlap, namaz vaqtında teşkerüv yapmaq içün tekrar kirdiler. Bu sebepten ceza: turmadılar, ürmet etmediler. Olar, dua etken er kesni daa deşetli bir apishanege, beton kamerağa tüşürmek içün, sert rejimli müstemlekeniñ eñ sert şaraitine mahsus kirdiler. Olar ise STŞda — dört insan, musulmanlar, bu suvuqta — minus 20-22 derecede", — dep Dilâra Abdullayeva yazdı.
Onıñ aytqanına köre, eger de Teymurğa qoşma ceza berilmese, o, ilk qış ayınıñ 31-ne qadar ceza izolâtorından sert şartlı apishanege qaytarılacaq.
Bu 15 künni esapqa alsaq, Abdullayev ŞİZOda 1035 künden ziyade tutuldı. Çoqusı allarda müstemleke hadimleri qırımtatarlarğa ne içün izolâtorğa qoyulğanını ve ne içün anda bulunma müddetini uzattırğanlarını añlatmaylar. Keçken sefer Teymur Abdullayev namaz vaqtında müstemleke yolbaşçısını selâmlamadı.
"Zonatelekom" esirlik bağınen de esirlerge telefon etmege yasaq eteler. Qorantasınen bağını tek mektüpler vastasınen qoruy. Bu sene oraq ayında o, apiske alınğanından soñ doquz yıl içinde ilk sefer küçük qızı Asmanı kördi. Arman ayında adliyeci Rustem Kâmilev mabüsiniñ ceza izolâtorına qanunsız qaytarıluvı boyunca dava açtı.
Abdullayev apiske alınğan soñ sağlıq meseleleri peyda oldı — yüksek qan basımı, körme zayıflaştı ve büyrek meseleleri peyda oldı. Daa evel o, şiddetli baş ağrıları, köz ve tiş ağrılarından şikâyet ete edi, ve eki kere keskin nefes virus yuqunçından soñ otit tedaviylenmesini talap ete edi. Qorantası Abdullayevniñ sağlıq meselelerini onıñ muntazam sürette ŞİZOda bulunmasınen bağlay.
"Hizb ut-Tahrir davası"nıñ birinci Aqmescit gruppası aqqında ne bilemiz
2016 senesi orta küz ayınıñ 2-nde Aqmescit rayonınıñ Kamyanka ve Stroğanivka mikrorayonlarında kütleviy tintüvler keçirildi. Beş adam tutuldı ve Rusiyede yasaq etilgen "Hizb ut-Tahrir" islâm siyasiy firqasınıñ faaliyetinde qabaatlanğan edi.
2019 senesi bozarğan ayda Rostov-na-Donu Cenübiy bölgeniñ arbiy makemesi "Hizb ut-Tahrir davası"nıñ birinci Aqmescit gruppasınıñ mabüslerini: Teymur Abdullayev sert rejimli müstemelekede 17 senege, Uzeyir Abdullayev 13 senege, Rustem İsmailov 14 senege, Ayder Salidenov ve Emil Cemadenov 12 senege maküm etti.
2019 senesi ilk qış ayınıñ 24-nde Rusiye Yuqarı makemesi mabüslerniñ ükümlerini 6 ayğa qısqartıp, deñiştirdi. Böyleliknen, Teymur Abdullayev 16 sene 6 ay apis cezasına ve 1 sene 4 aylıq memuriy nezaret cezasına maküm etildi, Uzeyir Abdullayev 12 sene 6 ayğa, Rustem İsmailov 13 sene 6 ayğa, Emil Cemadenov 11 sene 6 ayğa, Ayder Salidenov 11 sene 6 ayğa apis cezasına maküm etildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım habelerine abuen oluñız
