Siyasiy mabus Teymur Abdullayev, öz qızı Esmanen 2016 senesiniñ orta küz ayında apiske alınğanından doquz yıl keçken soñ birinci kere tanış oldı.
Bu aqta "Qırım birdemligi"ne uzun körüşüvde aqayını musafirlikke kelgen qırımtatarnıñ apayı Alime bildirdi.
Babası, apiske alınğanda, Esma üç aylıq edi, dey apayı.
"O, onı qarşılamağa ketti, çünki onı tek büyük qardaşlarınıñ sözlerinden bile edi. Bütün yol boyu, o, babam nasıl olğanını, boy-postu ne qadar olğanını, qıyafetini soradı. "Ne içün soraysıñ?", dep sorağanda, o cevap berdi: "Men qorqam, belki de birevnen şaşmalattırım." Timur kirgende, ilk degeni: "Esma, keldiñmi, qızım?", — dep, onı quçaqlap, köküsine qattı bastı. O, közyaşlarına patladı, közleri daa çoq yaşqa toldı. O, laf etip olamay, boğazına bir şey kelip tıqıldı. Babasınıñ keñ köküsine tayanıp, çoq vaqıtlar onıñ yanından ayırılmadı", — dedi Alime Abdullayeva.
Teymur Abdullayev, endi beş yıldan berli Başqurtistannıñ Salauat şeeriniñ VK-2 zonasında buluna. Siyasiy mabusqa "Zonatelekom" apishane bağ vastasınen çağıruv yapmağa ruhset berilmey. Ailenen qonuşmaqnıñ tek bir yolu – mektüpleşüv, dey apay.
Esirlikte Abdullayev, yüksek qan basımınen çekişe. Bundan da ğayrı, onıñ körüv qabiliyeti kerginleşe ve büyrek meseleleri peyda oldı, dey Alime Abdullayeva.
Hatırlatamız ki, ağa-qardaş Üzeir ve Teymur Abdullayevler 2016 senesiniñ orta küz ayında daa üç qırımtatarnen beraber yaqalanğan ediler. Olar "Hizb ut-Tahrir" islâm siyasiy fırqasınıñ faaliyetine qoşulğanlarında qabaatlandılar.
2019 senesi kiraz aynıñ 18-de Rostov-na-Donu şeerindeki Şimaliy Kavkaz rayonınıñ arbiy mahkemesi, ağa-qardaş Teymur ve Üzeir Abdullayevlerni 17 ve 13 yıl müddetine makeme etti.
"Hizb ut-Tahrir davası"nıñ birinci Aqmescit gruppası aqqında ne bilemiz
2016 senesi orta küz ayınıñ 2-nde Aqmescit rayonınıñ Kamyanka ve Stroğanivka mikrorayonlarında kütleviy tintüvler keçirildi. Beş adam tutuldı ve Rusiyede yasaq etilgen "Hizb ut-Tahrir" islâm siyasiy firqasınıñ faaliyetinde qabaatlanğan edi.
2019 senesi bozarğan ayda Rostov-na-Donu Cenübiy bölgeniñ arbiy makemesi "Hizb ut-Tahrir davası"nıñ birinci Aqmescit gruppasınıñ mabüslerini: Teymur Abdullayev sert rejimli müstemelekede 17 senege, Uzeyir Abdullayev 13 senege, Rustem İsmailov 14 senege, Ayder Salidenov ve Emil Cemadenov 12 senege maküm etti.
2019 senesi ilk qış ayınıñ 24-nde Rusiye Yuqarı makemesi mabüslerniñ ükümlerini 6 ayğa qısqartıp, deñiştirdi. Böyleliknen, Teymur Abdullayev 16 sene 6 ay apis cezasına ve 1 sene 4 aylıq memuriy nezaret cezasına maküm etildi, Uzeyir Abdullayev 12 sene 6 ayğa, Rustem İsmailov 13 sene 6 ayğa, Emil Cemadenov 11 sene 6 ayğa, Ayder Salidenov 11 sene 6 ayğa apis cezasına maküm etildi.
Telegram, WhatsApp, Facebook ve YouTube-ta Suspilne Qırım haberlerine abune oluñız
