"Almenda" vatandaşlıq maarifi merkezi vaqtınca işğal etilgen topraqlardan, şu cümleden Qırımdan, kelgen studentlerniñ Ukrayina aliy oquv yurtlarına integratsiyası aqqında tedqiqatnıñ neticelerini taqdim etti. Soravda 1 294 talebe iştirak etti. Onıñ neticelerine köre, gençlerniñ çoqusı içün vatanperver niyetleri iştirak etüvniñ esas sebebi ola.
İlk qış ayınıñ 2-nde "Almenda" Merkeziniñ esabatında bu aqqında aytıla.
Sorav malümatına köre, soravdan keçkenlerniñ 35%-i kelecegini Ukrayinanen bağlağanını ve yalıñız ukrayin tilinde tasil almaq istegenini bildirdi. Daa 16%-i belli bir zenaatqa irişmek içün, 15%-i ise yañı bilgiler almaq içün universitetke kirdi.
Soravda iştirak etkenlerniñ çoqusı, yani 92%-i, Ukrayina nezaretindeki topraqqa köçti, 8%-i ise VİETda qala ve uzaqtan oquy.
Esabatta qayd etilgenine köre, eñ çoq Zaporijjâ vilâyetinden kelgen talebeler (20%-i), Herson vilâyetinden (18%-i) ve Donetsk vilâyetiniñ 2022 senesi kiçik aydan soñ işğal etilgen qısmından kelgenler (16%-i).
Merkezniñ malümatına köre, soravdan keçkenlerniñ 76%-i ukrayin aliy oquv yurtlarına öz isteginen kirdi. 15%-i içün ana-babasınıñ tesiri müim edi, daa 5%-i malümat menbaları saylavlarını şekillendirdi.
"Esas sebebi — vatanperverlik ve kelecegini Ukrayina ile bağlamaq istegidir. Bu sebep, uzaqtan oquğan talebeler içün daa müimdir. Tasil ve zenaat sebepleri de müim qala (mütehassıslıq merağı, bilgi ve karyerağa ıntıluv)", — dep tedqiqatta qayd ettiler.
İşğal etilgen Qırımda yaşağan studentlerniñ 34%-i bu qararğa para tesir etkenini bildirdi. Hususan, 24%-iniñ köçmege imkânları yoq, daa 10%-iniñ meskenni kirağa almaq içün parası yoq.
Almendeniñ araştırmasına köre, İnternetke irişim de mesele olaraq olıp qala. Talebelerniñ tek 35%-i stabil bağğa saip, 41%-iniñ yavaş ya da stabil olmağan interneti bar, 13%-i ise sıq-sıq ondan marum qala. Amma, uzaqtan tasil alğanlarnıñ 88%-i tasil keyfiyetinen memnün, daa 5%-i memnün degil.
Soralğanlarnıñ aman-aman beşte biri işğalli akimiyet tarafından manialar aqqında bildirdi: taqip telükesi, ukrayin resurslarına irişimniñ blok etilmesi, telefon ve noutbuklarnıñ teşkerilmesi.
Bundan da ğayrı, sahte malümat tarqalmaqta — vesiqalarsız kiriş imkânsız olğanı aqqında laflar, arizanı berüvniñ uydurılğan müddetleri ve ukrayin universitetleriniñ VİETdan studentlerni qabul etmekten vazgeçkenleri aqqında efsaneler, dep esabatta qayd etildi.
Hatırlatamız ki, bu sene, "Almenda" vatandaş maarifi merkeziniñ uquqçısı Valeriya Kuberskanıñ malümatına köre, ukrayin aliy oquv yurtlarına Qırımdan tek 42 abituriyent kirdi.
Qıyın şaraitke baqmadan, universitetler vaqtınca işğal etilgen topraqlardan kelgen talebeler içün derslerni uyğunlaştırmağa tırışalar. Suspilne Qırım jurnalistleri, ne içün talebelerniñ sayısı eksilgenini, devlet ve universitetler ukrayin tasilini saylağanlarğa qol tutmağa tırışqanını ögrendi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
