İşğal etilgen Qırımda Ukrayina tamır halqlarından biri — qırımçaqlar sayısınıñ eksilüvi qayd etile. Bugün yarımadada 200-den ziyade qırımçaq yaşay. Bu, çoq qatlı bir binanıñ sakinlerinen qıyaslana bile. İşğal altındaki qırımçaqlar daa bir sıra meselenen qarşılaşalar.
Qırımçaq halqınıñ faalcisi Tetâna Kosetska Ukrayina tamır halqları kongressi çerçivesinde "Rusiye silâlı tecavuzı şaraitinde Ukrayina tamır halqlarına telükeler" adlı birinci munaqaşa vaqtında bunı bildirdi, dep Suspilne Qırım mühbiri haber etti.
O, qırımçaqlarnıñ şimdiki esas meselelerini qayd etti:
- Sayısınıñ eksilüvi. Gençler yarımadanı terk eteler, lâkin ananelerniñ büyük taşıyıcıları qala. Bu, nesiller arasındaki boşluqnıñ sebebi ola.
- Bilgilerniñ ğayıp oluvı. Medeniy bilgiler Qırımda qala, amma işğal sebebinden genç nesilge olarnıñ berilmesi qıyınlaştı.
- Azatlıqnıñ sıñırlanması. Sakinler işğal etilgen topraqlarda öz nazar noqtasını ya da isteklerini açıq şekilde ifade etip olamaylar.
- Tedqiqatnıñ imkânsızlığı. Qırımçaqlarnıñ artefaktlarınıñ çoqusı işğal etilgen Qırımda qala, bu ise tarihiy-arheologik tedqiqatlarnı blok ete.
Kosetska qayd etti ki, Ukrayina akimiyetiniñ kontroli altında bulunğan topraqlarda Ukrayina tamır halqlarınıñ kongresi kibi tedbirlerniñ keçirilmesi tamır halqları içün pek müimdir:
"İşğal etilmegen topraqta tuvğan topraqqa yaqın olğan insanlar arasında bulunmaq — qıymetlidir. Biz acele meselelerni muzakere ete bilemiz, umumiy qararlar ala bilemiz ve mirasımıznı saqlamaq yollarını qıdıra bilemiz", — dep o ayttı.
Hatırlatamız ki, ilk qış ayınıñ 2-nde Kıyivde Ukrayina tamır halqlarınıñ kongressi olıp keçe. İştirakçiler tamır halqlarınıñ cenk vaqtında qarşılaşqan esas meselelerni muzakere eteler — olarnıñ aqlarını ve medeniy mirasını qorçalavdan başlap, Qırım işğalden azat etilecek soñ devlet siyasetini şekillendirüvge qadar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
