Keçken afta devamında — boş aynıñ 10-ndan 16-na qadar — işğal etilgen Qırımda Rusiye mahsus hızmetleri yañı tintüvler ve yaqalavlar keçirdi, işğalci mahkemeler qanunsız ükümler çıqardı. Bundan ğayrı, qanunsız sürette apiske alınğan qırımlı siyasiy mabüslernen bağlı bozuvlar qayd etildi.
Suspilne Qırım bu afta işğalciler tarafından Qırımda insan aqları bozulğanını talil etti. Tafsilâtlıca daa soñra oquñız.
Aqyarda RF ordusı aqqında "yalanlar" içün birinci cinaiy dava açıldılar — qadınnı 5 yıldan ziyade "cezalandırdılar"
İşğal etilgen Sevastopolda (Aqyarda) 38 yaşında qadınnı 5 yıl ve 6 ayğa qanunsız "cezalandırdılar". Onı "Rusiye ordusı aqqında yañlış malümat" tarqatqanında qabaatladılar. Qabaatlavnıñ sebebi, 2024 senesi Telegramda eki izaat olğanı iddia etileler.
İşğalci prokuraturası qanunsız "qamaçavğa" oğratılğan qadınnıñ şahsiy malümatını bermedi. Açıq menbalarğa köre, söz Katerına Fomenko aqqında kete. İşğalciler onı Simferopoldaki (Aqmescitteki) SİZO-1-de tuta ediler. Bundan evel işğalci "mahkeme" onı eki kere internette yazğanları içün para cezasını alğan edi.
14 yıl "devlet hainligi" içün: işğalciler qanunsız sürette 22 yaşındaki Keriç sakinini mahküm etti
İşğalci "Qırım Yuqarı mahkemesi" 22 yaşındaki Keriç sakini Ukrayina mahsus hızmetlerine Rusiye arbiyleriniñ koordinatlarını bergeninde qabaatlap, 14 yıl sert rejimli koloniyada qalmasına üküm etti — oña "devlet hainligi" maddesini qoştılar.
İşğalci uquq qoruyıcılar aqaynıñ adını ve soyadını aydınlatmay. Onıñ qanunsız tutulğanı aqqında ilk yaz ayınıñ 17-nde haber etilgen edi.
Rusiyede Qırım sakinini içtimaiy ağlarda Qırım köprü aqqında yazğanları içün mahküm etecekler
Rostov-na-Donu şeerinde içtimaiy ağlarda Qırım köprü aqqında yazğanları içün Qırım sakini qanunsız şekilde mahküm etilecek. O, FSBniñ işğalli hadimleri tarafından qanunsız keçitniñ "yoq etilmesine çağıruvlar" sebebinden tutuldı. İşğalcilerniñ qabaatlav qararını Rusiye Federatsiyasınıñ Cenübiy bölgeniñ arbiy mahkemesine yolladılar.
Qırımda FSB "Mitropolit Tihonğa ücüm" davası çerçivesinde tintüv keçirdi: ukrayin timsallerini taptılar
İşğal etilgen Qırımda FSB işğalli "Simferopol ve Qırım mitropoliti" Tihonğa qarşı yapılğan ücüm davası çerçivesinde tintüvler keçirdi. Rusiye quvetçileri yañı mabüslerni sorğuğa çekken videolarda ukrayin milliy timsallerini köstereler. Bundan ğayrı, FSBniñ tintüvleri Moskvada ve Pskov vilâyetinde keçti.
Hatırlatamız ki, 2025 senesi kiçik ayda "Mitropolit Tihonğa ücüm davası" boyunca mitropolitniñ yardımcısı Denıs Popovıç ve kâtibi Mıkıta İvankovıç tutuldı. O vaqıt FSB bildirdi ki, terakt "Ukrauina mahsus hızmetleriniñ vazifesinen" azırlanğan edi, şübheliler ise "Moskvadaki Sretenskiy manastırında bomba patlatmaq, soñ ise Ukrayina vesiqalarınen Rusiyeden çıqmaq" kerek ediler.
Rusiye quvetçileri, işğalli mitropolit Tihonnı öldürmekniñ maqsadı "Rusiye ve AQŞ arasında muzakerelerni bozmaq" olğanını iddia ete.
İşğalciler Noman Çelebicihan batalyonında iştirak etkeni içün aqay ve qadını ğıyabiy şekilde "mahkemege" berdi
Herson vilâyetinde 49 yaşındaki qadın ve 31 yaşındaki erkekni işğalciler "Noman Çelebicihan adına qırımtatar batalyonı davasında" qanunsız surette 8,5 ve 9 yıl apis cezasına mahküm ettiler. Olarnı "halqara qıdıruvğa ilân ettiler". İşğalci tahqiqatnıñ malümatına köre, 2016 senesi erkek "keçüv noqtasında nevbette tura edi", qadın ise — "territoriya temizley, odun ala ve aş pişire edi".
Qırımnıñ işğalci "mahkemesi" jurnalist ve uquq qoruyıcı Lütfiye Zudiyevanıñ para cezasınıñ apelâtsiyanı red etti
İşğalci "Qırım Yuqarı mahkemesi" qırımtatar jurnalisti ve aq qorçalayıcısı Lütfiye Zudiyevanıñ istinaf şikâyetini red etti. İlk küz ayında "Canköy rayon mahkemesi" oña Rusiye Federatsiyası Memuriy cinayetler kodeksiniñ 19.34 maddeleriniñ 1-inci qısmı boyunca 30 biñ ruble (tahminen 10 biñ ğrıvna — muar.) para cezasını berdi. Lutfiye Zudiyevni işğalciler qural aynınıñ 16-nda "çetel agentleri" cedveline kirsettiler ve bu, Qırımda qırımtatarlar arasında "çetel agenti" tanılmasınıñ ilk adisesidir. Onı Rusiye Adalet nazirligine ariza bermegeni içün qabaatlaylar.
Siyasiy mabüslerniñ aqlarınıñ bozuluvı qayd etildi - Aleksandr Sızikov, Fevziye Osmanova, Elviza Aliyeva ve Nasiba Saidova, Emet Suleymanov, Lenur Halilov, Tofik Abdulgaziyev
Qırımtatar siyasiy mabüsi Oleksandr Sizikovnıñ anası Olena kör oğlu qanunsız alda tutulğan SİZOda bulunğan edi. O, oğluna ilâc ve tonometr bermege istedi, amma işğalciler oña oğluna ilâc bermege imkân bermediler, tek tesadufiy tibbiy basınç ölçev cihazını alıp kettiler, o da test neticelerini sesli olaraq bildirir. Siyasiy mabüsniñ daa bir mektübi keldi, o, izolâtor şaraitlerinden şikâyet ete — kamerada qızdırıcı yoq.
"İzin berilmey": Rusiyeliler hasta qırımtatar jurnalisti Amet Süleymanovnıñ ilâclarını qayttı
Rusiyeliler hasta vatandaş jurnalisti Amet Süleymanov içün ilâc paketini qabul etmediler. Ekim ayınıñ 24-nde onıñ apayı Volodımır merkeziy apishanesine yolladı, amma onı keri qaytardılar. Ametniñ apayı Lilâ Lumanova Facebookta haber etti ki, paket içinde yaşamaq içün kerek olğan ilâclar bar edi.
Hatırlatamız, bu sene arman ayında Amet Süleymanovnıñ apishanede ekinci kere gipertonik buhranı olğanı belli oldı. Oña angioptiya diagnozı qoyuldı, bu da körüv qabiliyetini coya.
Qırımlı siyasiy mabüs Tofik Abdulgaziyev Çelâbinsk tuberkulöz hastahanesinde körligini coya — Qırım birdemligi
"Hizb ut-Tahrir davası" boyunca qanunsız sürette 12 yıl apis cezasına mahküm etilgen qırımtatarı Tofik Abdulgaziyev Çelâbinskteki apishaneniñ tuberkulöz hastahanesinde körüniñ qısmen ğayıp oluvı aqqında bildirdi. Onıñ sıñır körüviobyektlerni ve areketni merkeziy noqtasından tış körmek qabiliyeti, 180 derecege qadar keñ körüv alanını temin etüv bütünley ğayıp oldı ve esas körüvi körmemez oldı.
Lenur Halilovnıñ advokatı makemeniñ siyasiy mabüsni müstemlege qaytarmaq qararına apellâtsiya berdi — "Qırım birdemligi"
Ağır hasta olğan siyasiy mabüs Lenur Halilovnıñ adliyecisi Emil Kurbedinov orta küz ayınıñ 14-nde Arhangelsk vilâyet mahkemesiniñ musulmannı müstemlekege qaytarmaq qararına qarşı kassatsiya şikâyetini berdi.
"Qırım musulmanına apishanede bir qaç ağır hastalıq qayd etildi: şu cümleden, ciger kanseri, hronik hepatit C, II derece gipertoniya, çoq ciger şişigi, sol büyrek şişikleri ve büyrek taşları. Arman ayında İsakogorsk rayon mahkemesi Halilovnı 18 yıllıq apis cezasından azat etmege qarar berdi — onıñ hastalıqları Rusiye Federatsiyası ükümetiniñ mahküm etilgenlerniñ sağlıq alına köre azat etilmesi içün sebepler cedveline kirsetilgen", — dep "Qırım birdemligi" yazdı.
Apiske alınğan qırımtatar qadınlarınıñ anaları Simferopoldaki 1-nci SİZOnıñ vekilinen körüştiler — "Qırım birdemligi"
Siyasiy mabüsler Fevziye Osmanova, Elviza Aliyeva ve Nasiba Saidovanıñ anaları Simferopoldaki (AqmescittekiRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) 1-nci SİZOnıñ vekilinen körüştiler ve tutulğan qız-qadınlarnıñ izolâtordaki yaramay şaraitine şikâyet ettiler.
"Biz aytamız — o quru, suvuq. "Er yerde böyle", dep ayta. Bizler eşitkenimizni aytamız — anda em kemiriciler, em de fırın böcekleri bar. "Bu, olarnıñ kameralarını nasıl tutqanlarına bağlı", — dep cevap bere. Biz aytamız: çamaşır, yorğanlar — olarnı qaç nesil qullanğan, olarğa öz eşyalarını bermek mümkünmi? Yoq, iç bir şey yapmaq mümkün degil", — dep Dinara İyüpova bildirdi.
Qadınlarnıñ şikâyetlerine köre, olarnıñ qızları erkeklerniñ ögünde yavlıqlarını çıqarmağa mecbur eteler. Baş müdirniñ muavini, mecbur etüv olmağanını ve bütün qızlar "yavlıqlarnı kiygenleri"ni ayttı.
İşğal etilgen topraqlardaki ukrayin yaşları Rusiye repressiyalarınıñ maqsadı ola — Lubinets
Rusiyede diversiya içün mesüliyetke dair qanun deñişmelerini azırlaylar — 14 yaşından başlap gençlerni ömür boyu apis cezasınen cezalandıracaqlar. Yuqarı Şuranıñ insan aqları vekâletlisi Dmıtro Lubinetsniñ fikirince, bu "işğalge qarşılıq köstergen er keske qarşı terror ameliyatı"dır.
"Bu qanunlar vaqtınca işğal etilgen topraqlarda yaşağan ukrayin gençleri içün hususan telükelidir. Ocalar ve gençler işğalli maşna içün kerçek telüke oldılar: olarnıñ nazar noqtası, cesareti ve yerli qarşılığı işğalcilerniñ nezaretini boza", — dep Dmıtro Lubinets yazdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
