Ukrayina Silâlı quvetleriniñ Baş ştabı bildirdi ki, boş aynıñ 11-ne keçer gecesi Ukrayina Mudafaa quvetleriniñ bölükleri işğal etilgen Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) "Deñiz neft terminalı"na ücüm etti. Obyektniñ toprağındaki rezervuarlarğa ücüm qayd etildi. Zararnıñ miqdarı ögrenile.
Ukrayina Silâlı quvetleriniñ Baş ştabı Facebookta bunı bildirdi.
"Deñiz neft terminalı" AT (Feodosiya) ücüm etildi. Qırım yarımadası ve vaqtınca işğal etilgen Ukrayina cenübiy topraqlarına deñiz yolunen yaqarlıq ve yağ malzemeleriniñ teminatı içün esas noqta ola. Obyektniñ toprağındaki rezervuarlarğa ücüm qayd etildi. Zararnıñ miqdarı ögrenile", — dep haberde qayd etildi.
Bu saba işğalli Feodosiya (Kefe) "başı" Volodımır Kim Telegramda neft bazası rayonında yerleşken Keriç şossesiniñ qapatıluvı aqqında haber etti.
Boş aynıñ 11-nde gece Kefede yerli sakinler Rusiye AMSniñ çalışqanını bildirdiler, dep "Qırım yeli" monitoring Telegram kanalı yazdı.
Rusiye Mudafaa nazirligi, Qırım üzerinde ve Qara deñiz suvlarında 14 uçucısız uçaq aletini tüşürgenini bildirdi.
Hatırlatamız ki, orta küz ayınıñ 18-nde işğal etilgen Feodosiyada (Kefede) "Deñiz neft terminalı" neft bazasınıñ uydu resimleriniñ talili, orta küz ayınıñ 7-nde ve 13-nde Ukrayina ücüm dronları tarafından yapılğan ücümlerden soñ, rezervuarlarnıñ bayağı zarar körgenini tasdıqladı. Bu fotoresimlerni Radio Svoboda, hızmetniñ Rusiye bölügine atfı etip, Telegramda derc etti.
"Orta küz ayınıñ 7-nde ve 13-nde olğan eki ukrayin ücüminiñ neticesinde 11 yaqarlıq anbarı bütünley yoq etildi, bir qaç tanesi zararlandı ve, ğaliba, ğayrıdan tiklenilmeycek", — dep Radio Svoboda rus hızmeti yazdı.
Hatırlatamız ki, Feodosiyadaki (Kefedeki) neft bazasına orta küz ayınıñ 12-nden 13-ne keçer gecesi MOMniñ "A" dronları ücüm etti, dep Ukrayina havfsızlıq hızmeti ve Ukrayina silâlı quvetleriniñ mahsus operatsiyaları quvetleri bildirdi.
Bundan da ğayrı, orta küz ayınıñ 6-nda ukrayin dronları yarımadada eñ büyük Feodosiyada yerleşken neft terminalına ücüm etti, dep Ukrayina Silâlı quvetleriniñ Baş ştabı tasdıqladı. Ertesi künü uydu resimleri yanğınnı kösterdi, o vaqıt o 12 km-ge qadar tarqalğan edi. Şaatlarnıñ aytqanlarına köre, yanğın endi yañı, üçünci rezervuarğa keçti.
Daa bir ücüm ilk küz ayınıñ 29-nda yapıldı.
Keçken sene de Feodosiyadaki (Kefedeki) neft bazası defalarca ücüm etildi.
Hatırlatamız ki, Ukrayina silâlı quvetleriniñ mahsus operatsiyaları bildirdi ki, boş aynıñ 10-na keçer gecesi dronlar işğal etilgen Qırımnıñ Yevpatoriya rayonınıñ Karyernedeki "Gvardiyskıy" FDKU neft bazasına ücüm etti. Dronlar, Rusiyeniñ arbiy obyektlerini ve ordu naqliyatını temin etmek içün qullanılğan bir neft bazasında olğan pompa stantsiyasına ücüm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
