Boş aynıñ 8-nde Kıyivde onlarnen insan Ukrayina Qaramanı, Qırım faalcisi, 2022 senesi ilk qış ayınıñ 18-nde Luğansk vilâyetiniñ Biloğorivka köyü yanında cenk areketleri alanında elâk olğan göñülli Ğennadiy Afanasyevniñ hatırasını añmaq içün toplaştı. Hatıra merasimi Qırım parkında keçken sene Afanasyevniñ adını alğan soqaqta olıp keçti.
Suspilne Qırım mühbiri bunı bildirdi.
Ölgen askerniñ hatırasını onıñ doğğan kününde añmaq — onıñ apayı Lüdmıla ve dostlarınıñ teşebbüsi. Olarnıñ aytqanına köre, bu soqaqlardan keçken insanlar öz qaramanlarını tanısa, bu eñ müimdir.
"Sıq-sıq soqaqlarnıñ adları deñişe, ve insanlar kimniñ adını taşığanlarını bilmeyler. Bazıları meraqlana, bazıları meraqlanmay. Bizim vazifemiz — aynı fikirde olğan insanlarnen körüşip, yerli sakinlerge bu soqaq kimniñ şerefine adlandırılğanını, onıñ ne yapqanını, Ukrayina içün böyle bir şey yapqanını aytıp bermektir", — dep Lüdmıla qayd etti.
Balalar içün ustalıq dersleri keçtiler: resim yapalar, oynaylar, mumlar yapalar, olarnı özlerinen beraber bayramğa alıp keteler. Büyükler ise qave ve tatlılarnen Ğennadiy ile bağlı eñ güzel hatıralarnı hatırlaylar. Bundan da ğayrı, ukrayin halq çalğı aletlerinde çalğan çalğıcılar çıqışta bulundılar.
"[Afanasyev] qızımıznı pek seve edi ve er vaqıt kelecek balalarda olğanını tüşüne edi. Bütün resurslarımıznı balalarğa sarf etmek kerekmiz, çünki olar bizim kelecegimizdir, dünyanıñ, milletniñ kelecegidir. Biz yapqan er şeyimiz balalar içün olmalı. O, çoq balalı, büyük bir qoranta qurmaq arzusında edi. Şükür ki, qızımız bar. Afsus ki, daa çoq vaqıtımız olmadı. Amma balalarğa quvanç hatırasını bağışlamaq imkânımız olsa, bunı yapamız", — dep Ukrayina Qaramanınıñ apayı tarif etti.
Afanasyevniñ qorantası ve dostları bu tedbirni endi ekinci kere keçireler. Keçken sene kiçik ustalar sınıfları bar edi, balalarnen ve büyüklernen qonuşa ediler. Bu sene artıq miqyaslandı: muzıkantlar davet etildi, daa çoq musafir, dep Lüdmıla añlattı.
"Bu tedbirni er yıl keçirmege planlaştıramız. Belki şekli deñişir. Bir yıl daa büyük ola bile, bir yıl daa qavenen termoslar ve yalıñız yaqın insanlar. Amma biz bu tedbirni bu soqaqta ve böyle sade, halq formatında keçirmege planlaştıramız", — dep qayd etti o.
Elâk olğan askerniñ anası Olğa Afanasyeva Suspilne Qırımğa bergen izaatında "ağrılanğanı"nı bildirdi. Onıñ aytqanına köre, insanlar onı bu künde qarşılamaq kerek olıp-olmağanını bilmey ediler.
"Men bu bayram olğanını tüşünem. O, bu künde doğdı, güzel bir ömür yaşadı... Bu pek müimdir. Ve bu tek ailemiz içün degil. Cenkte olğan adamlarnıñ tefsirlerini bilem. Olar deyler ki: "Biz de böyle hatırlanmaq ve ürmet etilmek isteymiz". Ve bu pek doğru", — dep Olğa Afanasyeva qayd etti.
Ğennadiyniñ dostları ve yaqınları onı "qarşılıq areketiniñ timsali" olaraq hatırlaylar, çünki Qırımlı ömür boyu adalet içün küreşti.
2014 senesi Rusiye mahsus hızmetleri onı işğal etilgen Qırımda tutıp, "terrorizm"de qabaatladı. Afanasyev açıqtan aytqan edi: onıñ şaatlığı işkencenen çıqarıldı, elektrik aqımı, urulması, maneviy basqı ve ilâhre. Rusiye apishanesinde eki yıldan ziyade oturdı.
2016 senesi azat etilgen soñ Qırım sakini Ukrayina kontrolindeki topraqqa qayttı ve diger ukraiynalı siyasiy mabüslerniñ azat etilmesi içün küreşmege başladı.
Tolu miqyaslı istilânıñ başında Afanasyev USQniñ reberlerine qoşuldı. Adam Harkiv ve Donetsk vilâyetlerinde cenk uruşları zonasını ziyaret etti. Onıñ cenk yolu Luğansk vilâyetinde yekünlendi.
"Kremlniñ siyasiy mabüslerniñ tuvğanları birleşmesi"niñ başı, apayı ve anası evelsi Suspilne Qırımğa 2022 senesi ilk qış ayınıñ 18-nde Luğansk vilâyetinde Ukrayinanı qorçalap elâk olğan Qırım askeri Ğennadiy Afanasyevniñ ikâyesini tarif ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
