Prezident Volodımır Zelenskıy Qırım sakini, sabıq siyasiy mabüs Ğennadiy Afanasyevge Ukrayina Qaramanı unvanını ölüminden soñ berilmesi aqqında fermannı imzaladı. O, Rusiye Federatsiyasınıñ Ukrayinağa istilâsı başlağanından berli devletni qorçalamağa başladı ve Luğansk vilâyetiniñ Biloğorivka köyü yanındaki uruş alanında ayatqa uyğun olmağan yaralanma neticesinde elâk oldı.
Ukrayina prezidenti Ofisiniñ saytında derc etilgen fermanda bu aqqında aytıla.
"Ukrayinanıñ devlet suvereniteti ve topraq bütünligini qorçalağanda köstergen şahsiy cesürligi ve qaramanlığı, Ukrayina halqına sadıq hızmeti içün: "Altın Yıldız" nişanınen Ukrayina Qaramanı unvanını Afanasyev Ğennadiy Serğiyovıç — büyük askerge (ölüminden soñ) berilsin", — dep vesiqada qayd etildi.
Hatırlatamız ki, elâk olğan Qırım sakini ukrayin arbiy hızmetçisi, ATO veteranlarınıñ reintegratsiya programmasını öz parasına qurğan sabıq siyasiy mabüs Ğennadiy Afanasyev, Qırım qarşılığınıñ ve Rusiye apishanelerinde tutulğan siyasiy mabüslerniñ yüzü ola.
"Kreml siyasiy mabüsleriniñ tuvğanları birleşmesi"niñ reisi, apayı ve anası, 2022 senesi ilk küz ayınıñ 18-nde Luğansk vilâyetiniñ Bilogorivka civarında Ukrayinanı qorçalap elâk olğan Qırım sakini olğan askerniñ ikâyesini Qırım cemaatına tarif ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
