Qırım siyasiy mabüsi Aziz Ahtemovnıñ apayı onı eki yıldan berli ilk sefer Rusiyeniñ Rubtsovsk şeerinde ziyaret etti.
"Qırımtatar resurs merkezi", onıñ apayı Adile Ahtemovağa esaslanıp, bunı bildirdi.
"Azizni körmek içün uzun ve qıyın bir yol keçtik. Soñki sefer eki yıl evelsi körüşken edik, dört yıldan ziyade bir masa başında oturğan edik. Sevinç ve keder aynı vaqıtta bizni qaplap aldı", — dep qadın yazdı.
Onıñ aytqanına köre, 2024 senesi boş aynıñ 5-nde Aziz Ahtemovnı Rubtsovsk şeerindeki TM-10ğa etap ettiler.
Orta küz ayınıñ 16-nda qoranta Simferopoldan (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adten) çıqtı: başta Soçige trennen, soñ Novosibirskke uçaqnen, soñ — Rubtsovskke daa bir trennen kettiler. Umumen olar beş biñ kilometrge qadar yol keçtiler.
"Azizni soñunda körgende, közyaşlarımıznı tutıp olamadıq. Onıñ közlerinde kızı içün olğan acılıq ve añqsızlıq körüne edi. O dedi: "Onı eki yaşında kördim, şimdi ise o büyük. Men onıñ meni nasıl qabul eteceginden qorqam"..., — dep o ayttı.
Onıñ aytqanına köre, körüşüv üç kün devam etti.
Ahtemov qardaşları aqqında ne bilemiz
Aziz ve Asan Ahtemovlar — qırımtatar faalcileridir.
2022 senesi berim ayınıñ 3 ve 4. künleri Aqmescitte ve Kezlevde beş qırımtatarı — iş adamı Eldar Odamanov, ağa-qardaşlar Aziz ve Asan Ahtemov, Şevket Üseinov ve Nariman Celâlovnı, Anğara köyünde gaz borusını patlatqanlarında şübeli sayılıp, tutuldı.
2022 senesi berim ayınıñ 6-nda işğalli "makeme", tutulğan qırımtatarlarnı apiske aldı.
2022 senesi berim ayınıñ 21-nde Qırımnıñ işğalli Yuqarı makemesi, Qırımtatar Milliy Meclisiniñ başınıñ muavini Nariman Celâl, vatandaş jurnalisti Asan Ahtemov ve onıñ qardaşı Aziz Ahtemovğa üküm çıqardı.
Asan Ahtemov 15 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı. Aziz Ahtemov 13 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı.
2023 senesi bozârğan ayda Qırımtatar Milliy Meclisiniñ başı Refat Çubarov, Aqmescit 2. SİZOnıñ memuriyeti Celâlov ve Ahtemov qardaşlarını maneviy ve fizikiy cezalandırğanını bildirdi.
2023 senesi orta küz ayınıñ başında Celâlov ve Ahtemov qardaşları Qırımdan Rusiye apishanesine etap etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
