Rusiyede Rusiye tarafından 2022 senesi orta küz ayında Qırım köprüni patlatmaqta qabaatlanğan sekiz insannı ömür boyu apis cezasına mahküm etmege isteyler. Daa evel Rusiye FSBsi bu "qabaatlav" sebebinden 5 Rusiye, 3 Ukrayina ve Ermenistan vatandaşını tuttı.
TASS Rusiye devlet agentligi bu aqqında yazdı.
Orta küz ayınıñ 29-nda Rostov-na-Donudaki Rusiye mahkemesinde 2022 senesi orta küz ayınıñ 8-nde Qırım köprüniñ "bozulması" davasında mahkeme munaqaşaları olıp keçti.
"Mahkeme"de devlet qabaatlav tarafı çıqışta bulundı, o, bütün "şübeliler"ge ömürlik apis cezasını talap ete.
"2022 senesi Qırım köprüniñ patlavında Artem Azatyan, Georgiy Azatyan, Oleg Antıpov, Oleksandr Bılin, Volodımır Zlob, Dmıtro Tâzelıh, Roman Solomko ve Artur Terçanân qabaatlana. Olarğa qarşı Rusiye Federatsiyası Ceza qanunnamesiniñ 205 maddesiniñ 3-ünci qısmıterror aktı, Rusiye Federatsiyası Ceza qanunnamesiniñ 222.1 maddesiniñ 4-üncipatlayıcı maddelerniñ ya da patlayıcı cihazlarnıñ qanunsız satın alınması, berilmesi, satılması, saqlanması, taşıması, yollanılması ya da taşıması qısmı boyunca dava açıldı. Bundan da ğayrı, Rusiye Ceza qanunnamesiniñ 226.1 maddesipatlayıcı aletlerniñ kontrabandasıne köre Solomko ve Tercanânğa cinaiy dava açıldı", — dep TASS yazdı.
Bu "dava" boyunca ilk oturış 2025 senesi kiçik aynıñ 12-nde olıp keçti. "Şübhelenilgenler"niñ episi qabaatını inkâr etti.
Nevbetteki "mahkeme oturışı" orta küz ayınıñ 30-nda keçirilecek — imayeci taraf söz alacaq.
Hatırlatamız ki, Rusiye FSBsi bildirdi ki, taqiqat devamında köpürniñ patlavına azırlıq körgeninden şübheli sayılğan 5 Rusiye vatandaşı, 3 Ukrayina ve Ermenistan vatandaşı tutuldı. O vaqıt Rusiye uquq qorçalayıcıları operatsiyada UMNniñ Bİİ iştirak etkenini iddia etti.
Soñ UHHniñ yolbaşçısı Vasıl Malük 2022 senesi orta küz ayınıñ 8-nde Qırım köpründe yüz bergen patlavda telükesizlik hızmetiniñ alâqası bar olğanını tasdıqladı. Tezden Moskva mahkemesi onı ğıyabiy şekilde tevqif etmege qarar aldı.
Rusiye Taqiqat eyyeti 2022 senesi orta küz ayında Qırım köprüniñ patlavında şübheli sayılğan beş ukrayin ve gürcini halqara qıdıruvğa ilân etti. Er bir şübheli qabaatlanğan şahısnı ğıyabiy şekilde qabaatladılar.
Keriç köpründeki patlavlar aqqında ne bilemiz
2022 senesi orta küz ayınıñ 8-nci sabası vaqtınca işğal etilgen yarımadanı Rusiyenen bağlağan Keriç boğazı üzerindeki Keriç köpründe yanğın çıqtı. Eki avtomobil yolları qısmen zarar kördi.
Keriç keçitindeki qanunsız köpürni nasıl yıqacaqsıñız: silâ ya da uquqnenmi? Mütehassıslarnıñ fikirlerini Suspilne Qırım maqalesinde oquñız.
Soñ UHHniñ yolbaşçısı Vasıl Malük mahsus operatsiyanıñ tafsilâtlarını tarif etti. Onıñ aytqanına köre, mahsus hızmet 2022 senesiniñ baarinden berli köpürni patlatmaq ğayesini taşıy edi, bütün bu vaqıt devamında çeşit variantlar baqıldı.
2023 senesi oraq ayınıñ 17-ne keçer gecesi Keriç köpründe patlavlar oldı. Bir qısım yoq etildi, diger qısım zararlandı. Belgorod vilâyetiniñ gubernatorı Gladkov köprüde ölgen erkek ve qadın aqqında bildirdi.
Operatsiya nasıl planlaştırılğanı ve onıñ aqibetleri aqqında — Suspilne Qırımğa UHH ve arbiy mütehassıslar tarif ettiler.
Suspilneniñ uquq qorçalayıcı organlardaki menbalar Keriç köprüne ücüm — UHH ve ADQ mahsus operatsiyası olğanını bildirdi. Mında bildirdiler ki, Keriç köpründe "patlama"nıñ teşkil etilmesi aqqında tafsilâtlar "Ğalebeden soñ aydınlatılacaq".
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
