Orta küz ayınıñ 22-nde Rostov-na-Donu şeerindeki Cenübiy bölgeniñ arbiy mahkemesinde Volodımır Ananyev davası boyunca oturış olıp keçti. İşğalciler onı işğalli "Qırım başı" Sergey Aksönovnı öldürmege tırışqanında qabaatladılar. Qanunsız tutulğan adamnıñ apishanede sağlığı fenalaşqanı aqqında mabüsniñ apayı bildirdi.
Qırım uquq qorçalayıcı gruppası bunı bildirdi.
Uquq qorçalayıcılarnıñ malümatına köre, oturışnı mahkemeci Denis Galkin keçirdi. Kelecek makeme oturışları 2025 senesi boş aynıñ 5 ve 25 künleri keçirilecek. Orta küz ayında Ananyevniñ apis müddeti 2026 senesi kiçik aynıñ 5-ne qadar uzatıldı.
Volodımır Ananyevniñ apayı Anna Svâtnenkonıñ Qırımtatar resurs merkezine bergen izaatında bildirdi ki, aqayınıñ sağlığı fenalaştı. 75 yaşındaki Ananyevniñ ayaqlarınen meseleleri bar, sopanen areket ete, eki közü ameliyat etildi, körmesi zor, birinde glaukoma inkişaf ete, ve yüksek qan basımı bar.
"Sağlıq vaziyeti fenalaştı. O kerekli tibbiy yardımnı, atta temel tibbiy yardımnı alamay. Bu körme, omurğa, adale, büyreklerge ait", — dep Anna Svâtnenko qayd etti.
Sergey Aksönovnı "öldürmege tırışuv" davası aqqında ne bilemiz
2025 senesi kiçik ayda Rusiye işğalcileri Sergey Aksönovğa qarşı suiqast azırlağanında qabaatlanğan Volodımır Ananyev, Volodımır Bodnar ve Oksana Şevçenkonı mahkemege berdi. İşğalli Qırım prokurorlığı dedi ki, ukrainler öz başına yapılğan patlayıcı alet yardımınen duşmannen işdeşlik yapqan Qırım sakininiñ maşinasını patlatmağa planlaştıra ediler.
Rusiye quvetçileriniñ malümatına köre, Bodnar Zaporijjâ vilâyetinden Qırımğa, Şevçenko kiralağan Simferopoldaki (Aqmescitteki) garaj qutusında saqlanğan patlayıcı aletni ketirdi. Qayd etilgenine köre, Aksönovnıñ marşrutını video nezareti kamerası vastasınen közetkenler.
2024 senesi kiçik ayda üçü de işğal etilgen Qırımda Rusiye FSBsiniñ hadimleri tarafından tutuldı. Olarğa qarşı "terroristik areketlerniñ azırlanuvı" ve "patlayıcı aletlerniñ qanunsız saqlanuvı" boyunca cinaiy davalar açıldı. Daa evel, saban ayınıñ 31-nde, Volodımır Bodnar da bu işte qabaatını tanıdı. Saban ayınıñ 3-nde mahkeme 75 yaşındaki Volodımır Ananyevniñ davasını baqtı.
Suspilne Qırım Volodımır Ananiyevniñ apayı, uquq qorçalayıcılar ve tanışlarınen subetleşip, Qırımnıñ eñ qart siyasiy mabüsiniñ "davası" aqqında tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
