Orta küz ayınıñ 19-nda işğalli Qırım akimiyeti bildirdi ki, yaqarlıq satılğan stantsiyalarnıñ sayısı qat-qat arttı. Olarnıñ malümatına köre, 89-93 satuv noqtası bar. Amma derc etilgen cedvellerde körüne ki, çoqusı benzin stantsiyalarında 1 ya da 2 yaqarlıq çeşiti qayd etile. Bundan ğayrı, ne qadar yaqarlıq bar olğanı aytılmay.
İşğalli Qırım "ükümeti" benzin ve yaqarlıq stantsiyalarınıñ sayısı arttırılğanı aqqında bildirdi.
"Qırım Cumhuriyetinde benzin serbest satılğan stantsiyalarnıñ sayısı arta. Bugü 93 yaqarlıq stantsiyasına yaqarlıq almaq mümkün", — dep Telegramda işğalli "Qırım nazirler şurasınıñ reisi" Gotsanük yazdı.
İşğal etilgen Aluştada benzinni tek üç yaqarlıq stantsiyasında almaq mümkün, dep işğalli memuriyetiniñ "başı" Galina Ogneva bildirdi. Onıñ malümatına köre, daa üç benzin stantsiyasında dizel ola bile.
İşğal etilgen Saq şeerinde, orta küz ayınıñ 18-nde, yaqarlıq tek bir stantsiyada ve tek AI-95 markası satıla edi. Şeerniñ işğalli "başı" Predibaylo bu aqqında haber etti.
Telegramda "Qırım yeli" nezaret kanalınıñ malümatına köre, yaqarlıq stantsiyasında "benzin degil, gaz" satıla.
Hatırlatamız ki, işğal etilgen Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) "Deñiz neft terminalı" neft bazasınıñ uydu resimleriniñ talili, ukrayin uçucısız uçaq aletleriniñ ücümlerinden soñ, rezervuarğa bayağı zarar ketirilgenini tasdıqladı.
Talilge köre, soñki ukrayin dronlarınıñ ücümleri 11 rezervuarnı bütünley yoq etti, daa bir qısmı keçken ücümlerde bayağı zarar kördi. Neft bazasındaki 43 rezervuardan 7 rezervuarı zarar körmedi.
İşğal etilgen Qırımda benzin qıtlığı sebebinden acele naqliyatnıñ çıqışı sıñırlandı. İnsanlarğa hastahanege öz başına barmağa tevsiye eteler.
"Hastahaneler yaqarlıqnı iqtisat etmege ve "acele yardım" seferlerini qısqartmağa emir ettiler. Sebebi — yaqarlıq qıtlığı ve işğalli memuriyetniñ buhranı al etmege becerememesi. Şimdi maşinalar yalıñız sıñırlanğan acele vaziyetler içün çıqa", — dep MMM bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
