Uquq qorçalayıcılar Lera Cemilovanıñ sağlıq alı fenalaşqanını bildirdiler — Qırımnıñ 1-nci SİZOsında bulunğan vaqıt o, sıq-sıq epileptik ücümlerge oğray. İşğalciler tarafından "devlet hainligi" içün 15 yılğa üküm etilgen 28 yaşında siyasiy mabüsniñ tibbiy yardımğa ihtiyacı bar.
"Memorial PZK" uquq qorçalayıcı leyhasınıñ saytı, öz menbalarına esaslanıp, bu aqqında haber etti.
"Cemilovağa epilepsiya diagnozı qoyuldı. Apiske alınğanda ücümler daa sıq ve daa şiddetli oldı. İlk küz ayınıñ 5-nde SİZOğa ekim çağırıldı. Yaqın vaqıtta, oña spazmğa ve epileptikke qarşı ilâclar berilgen edi, lâkin bu, Leranıñ alını stabilleştirmek içün yeterli degil. Tibbiy yardım almasınıñ lâğu etilmesi onıñ sağlığı ve ayatı içün keri qaytarılamaz aqibetlerge ketire bile", — dep haberde qayd etildi.
Hatırlatamız ki, Rusiye qanunlarına binaen, epilepsiya, tevqifke mania olğan hastalıqlar cedveline kirsetildi.
Hatırlatamız ki, 2025 senesi kiçik ayda ğayıp olğan Lenora Cemilovanıñ anası, 2024 senesi mayıs ayında qıdıruvdan soñ qızı "halq mahkemesi"ne ketirilgenini bildirdi. O, "narkotik teşkerüvinden keçmege red etkeni içün" 15 künge memuriy apis cezasını aldı. Daa soñra FSB hadimleri Lerağa, apis müddeti bitken soñ azat etilmeycegini, FSBge alıp ketilecegini ayttılar. O vaqıttan berli tuvğanları qıznıñ bulunğan yeri ve uquqiy statusı aqqında bir şey bilmey ediler.
Qırım sakininiñ anası işğalli FSB idaresine muracaat etti ve "Cemilovağa nisbeten cinaiy davalar açılmadı ve tahqiq etilmedi" cevabını aldı. Aynı zamanda işğalli prokurorlıq qadınğa bildirdi ki, "devlet sırını açıqlamaq yasağı sebebinden, hırsızlav şikâyetine tam cevap bermek imkânsız", dep añlatıp, prokurorlıq areketiniñ sebebi yoq.
"Memorial" portalınıñ malümatına köre, Lera Cemilova 10 ay devamında inkomunikado statusında edi.
Bu sene arman ayında "mahkeme" onı umumiy rejimli müstemlekede 15 yılğa üküm etti, 100 biñ ruble (tahminen 50 biñ ğrıvnâ — muar.) para cezasını berdi ve "devlet hainligi" içün azatlıqtan soñ bir buçuq yıllıq sıñırlav cezasını berdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
