İşğal etilgen Qırımda Federal havfsızlıq hızmetiniñ hadimleri Canköy rayonınıñ 28 yaşındaki sakini Lera Cemilovanı qaçırdı ve sekiz aydır belli olmağan yerde tutalar.
Bunı Irade uquq qorçalayıcı teşebbüsiniñ vekillerine ğayıp olğan qadınnıñ anası Lenora Cemilova bildirdi, dep "Tribunal. Qırım epizodı" yazdı.
"Qızım mayısnıñ 21-nde tutuldı. Tutuluv vaqtında bütün elektronik aletleri tutıp alındı — dört telefonı, noutbukı, USB diskleri, kamerası alındı. Ertesi künü onı Canköyniñ FSB bölügine alıp kettiler. Mayısnıñ 24-nde makeme narkotik teşkerüvinden keçmege istemegeni sebebinden 15 künge memuriy tevqif qararını aldı", — dep Lenora Cemilova tarif etti.
Daa soñra FSB hadimleri Lerağa, apis müddeti bitecek soñ, azat etilmeycegini, FSBge alıp ketilecegini ayttılar. O vaqıttan berli tuvğanları qıznıñ bulunğan yeri ve uquqiy statusı aqqında bir şey bilmeyler.
Qırımlı qadınnıñ anası FSB işğalci idaresine muracaat etti ve Cemilovğa nisbeten cinaiy dava açılmağanı ve taqiq etilmegenine dair cevap aldı.
Aynı zamanda işğalli prokurorlıq bildirdi ki, prokurorlıq areketiniñ sebebi yoq, ve "devlet sırını açıqlamaq mümkün olmağanı" sebebinden, hırsızlav şikâyetine tafsilâtlı cevap bermek imkânsız olğanını añlattılar.
"Lera Cemilovanıñ hırsızlanması vaziyetinde arbiy cinayetlerniñ alâmetleri bar, bu cümleden "bir de bir vatandaşlarğa qarşı yapılğan ücümler" ve "qanunsız apis cezası", — dep Irade teşebbüsiniñ uquq qorçalayıcıları tüşüne.
Mında hatırlattılar ki, FSB hadimleri tarafından yapılğan tintüvlerden ya da tevqiflerden soñ izsiz ğayıp olğan eñ azdan beş Qırım sakininiñ malümatı bar.
Telegram, WhatsApp ve Facebookta Suspilne Qırım haberlerine abune oluñız
