İşğal etilgen Qırımnıñ Aluşta rayonından 60 yaşındaki iş adamı Ruslan Nagayevni, "Hizb ut-Tahrir davası" çerçivesinde qanunsız olaraq 13 yılğa mahküm etip, eki yıl içinde üçünci kere hastahanege qoydılar.
"Qırım birdemligi" bunı bildirdi.
Uquq qorçalayıcılar birleşmesiniñ menbalarına köre, hastahanede Nagayevge planlaştırılğan teşkerüvler keçirilecek, bundan soñ ekimler tedaviylev ya da ameliyat aqqında qarar alacaqlar.
2024 senesi arman ayında siyasiy mabüsniñ tuvğanları ameliyatnıñ acele kerek olğanını bildirdiler. Qırımtatarnıñ yanğı basamağına keçken hronik hastalığı bar. Yaqalanğan adam apishaneniñ hastahanesine alıp ketirildi, amma tedaviylenüv tek hastalıq alâmetlerini azlaştırdı. Nagayevni o vaqıt bir mütehassıs baqmadı.
Aynı seneniñ boş ayında Çelâbinsk vilâyetiniñ apishanesinden Arhangelskke etaptan soñ adam ağır alda olğanı içün kene hastahanege yollanıldı.
"Nagayevniñ sağlıq vaziyeti aqqında kerçek malümat berilmey edi, meraqlanğan er keske kibi. Qırımtatar tedaviylengenini, amma yahşılaşmağanını ayttı. O vaqıt ekimler tek "ameliyat yapmağa kerekmi-yoqmı baqıp çıqmağa" vade ettiler. O vaqıttan berli onı öyle keçirmediler", — dep "Qırım birdemligi"niñ menbaları qayd etti.
Uquq qorçalayıcılar qoştılar ki, Ruslan Nagayevniñ yüksek qan basımı ve büyrek ağrıları bar edi. Bu 2023 senesiniñ başında belli oldı. Adam tuvğanlarına tiş hastalıqları bar olğanını ve revmatolog ve gastroenterolognıñ yardımı kerek olğanını ayttı. 2024 senesi arman ayında advokat, Yuqarı Ural apishanesine ekim kelgenini, amma siyasiy mabüsni baqmağanını bildirdi.
Ruslan Nagayev aqqında ne bilemiz
Aluştadan iş adamı Ruslan Nagayev "Hizb ut-Tahrir davası"nıñ Aluşta gruppasınıñ mabüsidir. Onı ve daa dört qırımtatar adamını 2019 senesi bozarğan aynıñ 10-nda tintüvlerden soñ tutıp, Rusiyede terroristik sayılğan, amma dünyanıñ çoqusı ülkesinde, şu cümleden Ukrainada serbest faaliyet etken İslâm siyasiy firqası Hizb ut-Tahrirde iştirak etkeninde qabaatladılar.
Ruslan Nagayev 13 senege üküm etildi. Moskva vilâyetiniñ apellâtsiya arbiy makemesi qararını deñiştirmedi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
