13 senege maküm etilgen qırımtatar Ruslan Nagayevniñ ihtisasiy ekimlerniñ mesleatına ihtiyacı bar.
Siyasiy mabüsniñ advokatı Yevhen Ğoroşko "Qırım birdemligi"ne bunı bildirdi.
Uquq qorçalayıcı Rusiye Federatsiyasınıñ Çelâbinsk vilâyetindeki Yuqarı Ural şeeriniñ apishanesinde Nagayevni ziyaret etti.
"Körüşüv apishaneniñ müdiriniñ emrinen pencereden keçti. Evelki körüşüvler ise şahsen keçirildi", — dep Ğoroşko qayd etti.
Onıñ aytqanına köre, siyasiy mabüs tibbiy yardım içün muracaat etti, amma onıñ muracaatları lâğu etildi.
"Ekim apishanege keldi, amma Nagayevni qabul etmedi", — dep advokat qoştı.
Siyasiy mabüsniñ apayı, aqayınıñ yüksek qan basımı, böyrek ağrıları bar olğanını ve apishanede kerekli tedaviylevni almağanını bildirdi.
Ruslan Nagayev aqqında ne bilemiz
Aluştadan iş adamı Ruslan Nagayev "Hizb ut-Tahrir davası"nıñ Aluşta gruppasınıñ mabüsidir. Onı ve daa dört qırımtatar adamını 2019 senesi bozarğan aynıñ 10-nda tintüvlerden soñ tutıp, Rusiyede terroristik sayılğan, amma dünyanıñ çoqusı ülkesinde, şu cümleden Ukrainada serbest faaliyet etken İslâm siyasiy firqası Hizb ut-Tahrirde iştirak etkeninde qabaatladılar.
Ruslan Nagayev 13 senege üküm etildi. Moskva vilâyetiniñ apellâtsiya arbiy makemesi qararını deñiştirmedi.
Hizb ut-Tahrir islâm siyasiy firqası tek Rusiyede terrorist olaraq tanındı, çünki bu teşkilâtnıñ azaları musulmanlarğa qarşı repressiyalar içün işğalli akimiyetni muntazam sürette tenqit ete ediler. Aynı zamanda Hizb ut-Tahrir dünyanıñ çoqusı ülkesinde, şu cümleden Ukrainada serbest çalışa.
Telegram ve Facebookta Suspilne Qırım haberlerine abune oluñız
