Sağlığı kritik olğan qırımtatar faalcisi ve siyasiy mabüsi Ruslan Nağayev bir aftadır Rusiyeniñ Arhangelsk şeerindeki hastahanede buluna. Yerli ekimler, adamğa ameliyat kerekli olıp-olmağanı aqqında qarar berip olamaylar.
Qırımtatar Maaliy Merkezi (QMM) bunı bildirdi.
QMM qayd etti ki, siyasiy mabüsniñ hastalığı içün uyğun olmağan tibbiy müessisege yatqızıldı. Ekimler ameliyat kerekli olıp-olmağanı aqqında netice fikirlerini aytıp olamay.
"Tabiy yardım planı olmağanına baqmadan, tuvğanlarına Ruslanağa kerekli şeylernen posılkalarnı bermege ruhset berdiler", — dep bildirdi QMM.
Ruslan Nagayev aqqında ne bilemiz
Aluştadan iş adamı Ruslan Nagayev "Hizb ut-Tahrir davası"nıñ Aluşta gruppasınıñ mabüsidir. Onı ve daa dört qırımtatar adamını 2019 senesi bozarğan aynıñ 10-nda tintüvlerden soñ tutıp, Rusiyede terroristik sayılğan, amma dünyanıñ çoqusı ülkesinde, şu cümleden Ukrainada serbest faaliyet etken İslâm siyasiy firqası Hizb ut-Tahrirde iştirak etkeninde qabaatladılar.
Ruslan Nagayev 13 senege üküm etildi. Moskva vilâyetiniñ apellâtsiya arbiy makemesi qararını deñiştirmedi.
Hatırlatamız ki, 60 yaşındaki Nağayevniñ büyrek hastalığı bar ve onıñ siydik taş hastalığı keskinleşti.
Telegram, WhatsApp ve Facebookta Suspilne Qırım haberlerine abune oluñız
