İşğalciler tarafından 19 yılğa mahküm etilgen arap tilini bilgen qırımtatar faalcisi İsmet İbragimovnı Dimitrovgraddan Rusiyeniñ Pskov vilâyetindeki Sosnovıy Bor köyündeki 6-ncı tüzetüv müstemlekesine yolladılar.
İlk küz ayınıñ 30-nda onıñ apayı Raziye Mustafayeva "Qırım birdemligi" cemaat teşkilâtına bunı bildirdi.
Şimdilik İbragimov karantin kamerasında buluna, bölükke keçirilmesini bekley. Qorantasına yazğan mektübinde o, temiz ava ala bile — bir raatlıq olğanını qayd etti:
"Mında, elbette, Qırım degil, amma Dimitrovgradnen qıyaslağanda temiz avanen nefes alam, mefruşat zavodından çıqqan ateş ve tuman yoq", — dep siyasiy mabüs mektübinde qayd etti.
Qırımtatar İsmet İbragimov üç qıznıñ babası ola. Anası yaqında vefat etken soñ, onıñ apiske alınğanına qadar qorçalağan qart babası qaldı.
Hatırlatamız ki, Rusiye Federatsiyasınıñ Apellâtsiya arbiy mahkemesi 2023 senesi orta küz ayınıñ 2-nde Cenübiy bölgeniñ arbiy mahkemesi tarafından sert rejimli müstemlekede 19 yılğa üküm etilgen İsmet İbragimovnıñ apellâtsiya şikâyetini red etti.
Qırımtatar resurs merkeziniñ malümatına köre, Qırım siyasiy mabüsleriniñ 32 tuvğanı mabüslerniñ qaytmalarını beklemeden vefat etti.
İsmet İbragimov aqqında ne bilemiz
İsmet İbragimov — Sudaqlı qırımtatar adamı, arap tilini bilgen, üç qıznıñ babasıdır. Apis etilmeden evel baqqanı qart ana-babası bar.
2020 senesi oraq ayınıñ 7-sinde Qırımnıñ farqlı rayonlarında bir qaç ev tintilgen soñ FSB işçileri qırım musulmanlarını tuttılar, olar arasında da İsmet ibrahimov edi. Bundan soñ faalcini Aqmescitteki müstemlekede qapattılar, birazdan Rostov-na-Donudaki 1. SİZOğa etap ettiler.
İbragimovnı 2003 senesinden Rusiyede yasaqlanğan "Hizb ut-Tahrir"niñ faaliyetini teşkil etmege qabaatladılar. "Memorial" uquq qorçalayıcı merkezi, qırımtatar adamını siyasiy mabüs olaraq tanıdı.
2022 senesi oraq ayında işğalli makeme İbragimovnı 19 senege maküm etti, olardan birinci 5 senesini apishanede keçirmeli. Azat etilecek soñ 2 sene devamında ketmege sıñırlanğan olacaq.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
