İşğal etilgen Qırımda 19 yılğa mahküm etilgen arapça tilşınası, qırımtatar siyasiy mabüsi İsmet İbragimov Ulyanovsk vilâyetiniñ Dimitrovgrad apishanesinden Pskovnıñ 1-nci SİZOa (tahqiqat izolâtorına) etap etildi.
İlk küz ayınıñ 12-nde onıñ apayı Raziye Mustafayeva aqayınıñ mektübini oqup, "Qırım birdemligi" cemaat teşkilâtına bunı bildirdi.
İbragimovnıñ angi müstemlekege avuştırılacağı belli degil. Pskov vilâyeti qırımtatarnıñ Qırımdaki evinden 2,5 biñ kilometr mesafede buluna.
Bundan da ğayrı, arman ayınıñ 27-nde adamnıñ anası vefat etti. O, 67 yaşında edi.
"[İsmet] yazdı ki, anası vefat etkeninde ve bu ağır vaqıtta bizni desteklemek içün biznen bağlanıp olamağanından qasevetlene", — dep Mustafayeva qayd etti.
Hatırlatamız ki, Rusiye Federatsiyasınıñ Apellâtsiya arbiy mahkemesi 2023 senesi orta küz ayınıñ 2-nde Cenübiy bölgeniñ arbiy mahkemesi tarafından sert rejimli müstemlekede 19 yılğa üküm etilgen İsmet İbragimovnıñ apellâtsiya şikâyetini red etti.
Qırımtatar resurs merkeziniñ malümatına köre, 32 Qırım siyasiy mabüsi apishaneden çıqmadan evel tuvğanları vefat etti.
İsmet İbrahimov aqqında ne bilemiz
İsmet İbrahimov — Sudaqlı qırımtatar adamı, arap tilini bilgen, üç qıznıñ babasıdır. Apis etilmeden evel baqqanı qart ana-babası bar.
2020 senesi oraq ayınıñ 7-sinde Qırımnıñ farqlı rayonlarında bir qaç ev tintilgen soñ FSB işçileri qırım musulmanlarını tuttılar, olar arasında da İsmet ibrahimov edi. Bundan soñ faalcini Aqmescitteki müstemlekede qapattılar, birazdan Rostov-na-Donudaki 1. SİZOğa etap ettiler.
İbrahimovnı 2003 senesinden Rusiyede yasaqlanğan "Hizb ut-Tahrir"niñ faaliyetini teşkil etmege qabaatladılar. "Memorial" uquq qorçalayıcı merkezi, qırımtatar adamını siyasiy mabüs olaraq tanıdı.
2022 senesi oraq ayında işğalli makeme İbrahimovnı 19 senege maküm etti, olardan birinci 5 senesini apishanede keçirmeli. Azat etilecek soñ 2 sene devamında ketmege sıñırlanğan olacaq.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
