Ukrayina Silâlı quvetleriniñ Baş ştabı, ilk küz ayınıñ 22-nde gece patlamalar eşitilgen işğal etilgen Qırımnıñ "Qaçı" arbiy ava limanında eki uçaqqa muvafaqiyetli ücümni tasdıqladı.
İlk küz ayınıñ 23-nde Baş ştab Facebook saifesinde bunı bildirdi.
"Vaqtınca işğal etilgen Qırım MC toprağında yerleşken "Qaçı" arbiy ava limanında eki uçaqqa muvafaqiyetli ücüm yapıldı. Duşman vastaları Ukrayina Mudafaa nazirliginiñ Baş istihbarat idaresiniñ bölüklerine ücüm etti. Neticeleri ve zarar körgenlerniñ sayısı daa da ögrenile", — dep haberde qayd etildi.
Hatırlatamız ki, ilk küz ayınıñ 22-nde gece işğal etilgen Sevastopolda (Aqyarda) "Qaçı" ve "Belbek" arbiy ava limanları yanında patlamalar eşitildi, dep yerli sakinler ayttılar. İşğalciler şeer civarlarında ve Qaçı rayonında altı UUA tüşürilgenini bildirdiler. İlk küz ayınıñ 23-nde saba Qırım köprü de aman-aman bir saatke qapatıldı.
Hatırlatamız ki, ilk küz ayınıñ 21-nde işğal etilgen Qırımda Yalta rayonınıñ Foros köyünde üç insan elâk oldı, 16 kişi yaralandı. "Foros" şifahanesi ve mektep zarar kördi, dep işğalli Qırım yolbaşçısı Sergey Aksönov bildirdi.
Hatırlatamız ki, ilk küz ayınıñ 21-nde işğal etilgen Qırımda Ukrayina Mudafaa nazirliginiñ "Prımarı" mahsus bölüginiñ arbiy hızmetçileri tarihta ilk sefer eki Be-12 "Çayka" Rusiye amfibiya uçağını yoq ettiler, em de Mi-8 çoq maqsatlı Rusiye vertolötını urdılar.
Bundan evel Bİİ bildirdi ki, ilk küz ayınıñ 21-nde "Prımarı" mahsus bölügi işğal etilgen Qırımda işğalcilerniñ üç Mi-8 çoq maqsatlı vertolötını ve qıymetli 55J6U "Nebo-U" Rusiye radiolokatsiya stantsiyasını urdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
