İlk küz ayınıñ 21-nde işğal etilgen Qırımnıñ Yalta rayonınıñ Foros qasabasında üç insan elâk oldı, daa 16 insan yaralandı. "Foros" şifahanesi ve mektep zarar kördi.
Telegramda işğalli Qırım yolbaşçısı Sergey Aksönov bunı bildirdi.
Aynı zamanda Rusiye Mudafaa nazirligi, keçken gece AMSnıñ nevbetteki vastaları 114 ukrayin dronını toqtatqanını ve yoq etkenini bildirdi, olardan 10-u — Qırım toprağı ve ekisi — Qara deñiz üzerinde tüşürildi.
Rusiye Federal tibbiyet-biologiya agentliginiñ (FTBA) bildirgenine köre, bu facia neticesinde 13 yaralağan adam ketirildi, 12-si hastahanege yattırıldı. Dört insan ağır vaziyette, yedi orta vaziyette ve eki insan reanimatsiyada buluna.
"Bir adamnıñ aqcigerleri ilâcnen temin etile. Bir hastağa qan quyuldı. Zarar körgenlerniñ arasında balalar yoq. 4 kişige ameliyat yapıldı", — dep Rusiye Federatsiyasınıñ FTBAniñ Yalta çoq saalı tibbiy merkeziniñ müdiri Olğa Yeromina bildirdi.
İşğalcilerniñ bildirgenlerine köre, ilk küz ayınıñ 21-nde aqşam uçucısız uçaq aletiniñ keritgeni zarar neticesinde işğal etilgen Qırımda "Foros" şifahanesiniñ toprağında bir qaç obyekt zarar kördi. Köyde mektep binası zarar kördi, Yalta rayonında ise ot yandı.
Hatırlatamız ki, ilk küz ayınıñ 21-nde işğal etilgen Qırımda Ukrayina Mudafaa nazirliginiñ "Prımarı" mahsus bölüginiñ arbiy hızmetçileri tarihta ilk sefer eki Be-12 "Çayka" Rusiye amfibiya uçağını yoq ettiler, em de Mi-8 çoq maqsatlı Rusiye vertolötını urdılar.
Bundan evel Bİİ bildirdi ki, ilk küz ayınıñ 21-nde "Prımarı" mahsus bölügi işğal etilgen Qırımda işğalcilerniñ üç Mi-8 çoq maqsatlı vertolötını ve qıymetli 55J6U "Nebo-U" Rusiye radiolokatsiya stantsiyasını urdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
