İlk küz ayınıñ 22-nde aqşam işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) "Qaçı" ve "Belbek" arbiy ava limanları yanında patlamalar eşitildi. İşğalciler şeer civarında uçucısız uçaq aletlerini tüşürgenlerini ayttılar.
İşğalli Sevastopol (Aqyar) gubernatorı Mihail Razvojayevniñ bildirgenine köre, dronlarnı Rusiye ava mudafaası quvetleri ve Qara deñiz flotı tüşürgen.
"Arbiy hızmetçilerimiz deñiz üzerinde çalışqan ediler: Sevastopolğa uçqan altı uçucısız uçaq aleti ve, ilk malümatqa köre, Qaçı rayonındaki tarla üzerinde bir dronnı yoq ettiler. Ot yanıp başladı, onı endi söndüreler. Ne şeerdeki, ne deñizdeki vatandaş obyektleri zarar kördi", — dep qayd etti o.
Aynı vaqıtta yerli sakinler "Qaçı" ve "Belbek" arbiy ava limanları yanında patlamalar eşitkenini bildireler, dep "Qırım yeli" Telegram kanalı haber berdi.
Bundan da ğayrı, ilk küz ayınıñ 23-nde saba işğalciler Qırım köprüni aman-aman bir saatke — 6:40-dan 7:36-ğa qadar qapatqanlar, dep Rusiyeniñ Köpürdeki vaziyet aqqında operativ malümat merkezi bildirdi.
Hatırlatamız ki, ilk küz ayınıñ 21-nde işğal etilgen Qırımda Yalta rayonınıñ Foros köyünde üç insan elâk oldı, 16 kişi yaralandı. Bundan ğayrı, "Foros" şifahanesi ve mektep zarar kördi, dep işğalli Qırım yolbaşçısı Sergey Aksönov bildirdi.
Hatırlatamız ki, ilk küz ayınıñ 21-nde işğal etilgen Qırımda Ukrayina Mudafaa nazirliginiñ "Prımarı" mahsus bölüginiñ askerleri tarihta ilk sefer eki Be-12 "Çayka" Rusiye amfibiya uçağını yoq ettiler, em de Mi-8 çoq maqsatlı Rusiye vertolötını urdılar.
Bundan evel Bİİ bildirdi ki, ilk küz ayınıñ 21-nde "Prımarı" mahsus bölügi işğal etilgen Qırımda işğalcilerniñ üç Mi-8 çoq maqsatlı vertolötını ve qıymetli 55J6U "Nebo-U" Rusiye radiolokatsiya stantsiyasını urdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
