2022 senesi küzde ruslar, işğal etilgen yarımadadan qaçqan Qırım sakini ve transgender qadın Liliya Hvılkanı "Rusiye ordusı aqqında yalanlar tarqatqanı" ve "narkotik saqlağanı" içün ğıyabiy şekilde mahküm etmege isteyler. Prokurorlar işğalli Keriç mahkemesinden müstemlekede 9 yıllıq cezasını isteyler. ''Üküm'' ilk küz ayınıñ 22-nde çıqarılacaq.
Liliya Hvılka ğıyabiy mahkeme oturışı aqqında öz Instagram saifesinde yazdı.
"Men qabaatımnı tanımayım. Bu qabaatlavlar siyasiy ola. İlk küz ayınıñ 22-nde mahkeme qararını alacaq. Bunı Ukrayinada ve dünyada bilmelerini isteyim", — dep Liliya Instagramda yazdı.
İşğalciler Qırım qadınnı 2022 senesi çiçek ayınıñ 8-nde Kramatorsk vokzalına Rusiye raketa ücümine dair yazısı içün qabaatlaylar. 61 insan elâk oldı, 120-den ziyade yaralandı.
Bundan soñ Liliya Hvılka tutuldı. O, Suspilne Qırımğa işğalden nasıl qurtulğanını ve Qırımda LGBT toplulığınıñ temsilcileriniñ taqip etilüvi aqqında tarif etti. Liliya — Keriçten transgender bir qadın. Qırımda öz kimligini gizlemege mecbur oldı. Anda onı İlya Ğantsevskıy olaraq bile ediler.
"Qırımdan ketkende ev apsinde edim, ayağımda elektron bilezik bar edi", — dep faalci tarif etti.
Bilezikni Liliya özü kesip aldı. Ukrayina doğma şeadetnamesinen Rusiye ve Belorusiye toprağından çıqmağa mecbur oldı. İnternetten tapılğan göñüllilerniñ yardımınen. Şimdi o, mahkemelerge uzaqtan barmaq içün izin almağa tırışa.
"Projektor" cemaat teşkilâtınıñ malümatına köre, işğal etilgen topraqlardan çıqqan eñ az 50 insan, LGBT kimligi sebebinden azap ve zorbalıqqa oğradı. Yedi zarar körgen insan uquq qorçaşayıcı organlarına muracaat etti. Ve bu cinayetlerniñ 13 şaatı bar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
