Rusiyede 11 yılğa mahküm etilgen Qırım siyasiy mabüsi Yaşar Şıhametov müstemlekede 30 kilogrammğa azlaştı ve ağır sağlıq meseleleri sebebinden areket etmege imkânı yoq, em de bozulğan buğumları ve diger sağlıq meseleleri sebebinden aman-aman yüremez.
Onıñ apayı Lilâ Şıhametova "Qırım birdemligi"ne bunı bildirdi.
Şimdi qırımtatar Kemerovo vilâyetiniñ Yaya qasabasında TM-37de ceza çeke. İlk yaz ayınıñ soñunda onı Saratovdaki FKLPU OTB-1 hastahanesinden o yerge etap ettiler.
"Sağlıq yaramay. O, Saratovdaki apishaneniñ hastahanesinde yattı, anda tedaviylenmedi, onı etap ettiler", — dep apayı bildirdi.
Şıhametovnıñ bozulğan buğumları sebebinden areket etemez, oña aş odağa ketirile. Advokatnen körüşken vaqıt onı saqatlı arabanen ketirdiler.
"Yürgende ve oturğanda pek ağıra. Bu sebepten men aman-aman yürmeyim. Yürsem, qoltuq tayaqnen yürem. 50 metrlik mesafeni eki buçuq saat içinde keçem. Yürüşten soñ er şey pek ağıra, ağrı kesici içmek kerek. İlâclardan, mide ülseri sebebinden, midem ağıra", — dep siyasiy mabüs tarif etti.
Sağlığı içün oña qoşma raatlıq kününi, qattı yataqlarda yatmağa ve şahsiy ayaqqap kiymege izin berdiler. Onı işten boşattılar. Müstemlekeniñ müdiri hastahanege yattırmaq ve saqatlıqnı resmiyleştirmek meselesini çezmege emir etti.
Buña baqmadan, Şıhametovnıñ qayd etkenine köre, saqatlıq gruppası içün vesiqalarnı Saratovada azırlamaq kerek edi, amma prokurorlıqnıñ talimatına köre, ekimler bunı yapıp olamadılar.
Şimdi ağrı kesiciler, basım ilâcları ve valânka içe. Bütün ilâclar tuvğanlarından ala.
Saratov vilâyetiniñ Balaşov şeerinde ötkerilgen evelki tibbiy teşkerüv vaqtında onıñ qara cigeri büyügeni ve büyrek taşları tapıldı.
"Menim önravlar arasındaki disklerim ezildi, ekinci ya da üçünci derecede buğumlarım bozuldı: tas-san, tiz ve ayaq tübü buğumları, yüksek basım, yürek ağrısı, şeker hastalığı, baş ağrısı, qulaq ağrısı ve sağ qulaqnıñ eşitme zayıflığı, körme zayıflaşması, nefes qıtlığı bar", — dep Şıhametov tarif etti.
Siyasiy mabüs TM-37niñ memuriyetine muracaat etip, onı hastahanege yattırmağa ve saqatlıqnı resmiyleştirmege rica etti.
"Maña saqatlı araba berilse edi, daa çoq areket ete bilir edim ve yürgende ağrı duymaz edim", — dep qırımtatar qayd etti.
Yaşar Şıhametov aqqında ne bilemiz
2021 senesi kiçik aynıñ 17-sinde Qırımdaki kütlevit tintüvlerden soñ işğalciler Yaşar Şıhametov ve daa beş qırımtatar adamını tuttılar.
2022 senesi berim ayınıñ 9-ında RF CQniñ 205.5. maddesiniñ 2. qısmına (RF qanunlarına köre terrorcı olaraq tanınğan teşkilâtnıñ faaliyetinde iştirak etüv) mücibi Şıhametov 11 senege maküm etildi. Tevqif müddetiniñ ibrinci dört senesini daa şiddetli şartlarnen apishanede keçirmeli.
Tevqif olunmadan evel aşçı olıp çalışqan qırımtatar adamınıñ ciddiy sağlıq meseleleri bar: hronik gipertoniya sebebinden qalp, mide, arqa ve qaara cigerler meseleleri bar. Yaramay sağlıq alı sebebinden makeme oturışları sıq sıq başqa tarihqa keçirildi. Üküm çıqarmadan evel adamğa acele yardım çağırğanlar.
2023 senesi ilk qış ayında Rusiyedeki Vlasıha şeeri Apellâtsiya makemesi, qart qırımtatar faalcisi Yaşar Şıhametovnıñ ükümini deñiştirmedi. Makeme oturışı vaqtında özüni yaramay duyğan ve aqrasınen ciddiy meseleler sebebinden qırımtatar adamını zaldan sediyede çıqardılar. Şimdi o, Saratov vilâyetiniñ Balaşiv şeeriniñ müstemlekesinde ceza çeke.
2024 senesi ilk küz ayında RF Yuqarı mahkemesi kassatsiya seviyesinde 11 senege mahküm etilgen qırımtatar faalcisi Yaşar Şıhametovnıñ ükümini deñiştirmeden qarar aldı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
