Berim ayınıñ 19-nda Rusiye Yuqarı makemesi 11 senege maküm etilgen qırımtatar faalcisi Yaşar Şıhametovnıñ ükmüni deñiştirmedi. İşğalciler qorçalayıcı tarafnıñ bütün delillerini red ettiler.
"Qırım birdemligi"ne advokat Emil Kurbedinov bunı bildirdi.
Qayd etilgenine köre, makeme oturışında imayeci Şıhametovnıñ taqip etilüvi "qanunğa esaslanmay", dep israr etti.
"Kerçekten de, 2005 senesinden berli, "Terrorizmge qarşılıq kösterüv" Federal qanunına köre, şimdiki qanunlarğa köre, Hizb ut-Tahrir terroristik teşkilât olaraq tanılmadı, ve balqa hulâsalar cinaiy taqip içün uquqiy sebeplerge uymay", — dep qayd etti advokat Kurbedinov.
Makemede Şıhametov özü "terrorist olmağanı"nı bildirdi. Onıñ qayd etkenine köre, o, "öz toprağında tınç yaşay edi", saba saat dörtlerde "terrorizmde qabaatlap, böyle büyük bir müddetke maküm etken insanlar onıñ evine izin almadan kirdiler".
Kurbedinov, siyasiy mabüsniñ sağlığı fena olğanını da ayttı.
"Onı (Şıhametovanı — muar.) modil yataqta ketirdiler, şimdi hastahanede buluna ve aman-aman areket etip olamay. O, belkemlik, qara ciger, büyrek ve başqa hastalıqlarnen büyük meseleleri bar olğanını ayttı. Bu vaqıt (apishane müddeti — muar.) devamında o, tek saqatğa çevirildi. Ahlâq ceetinden o pek yahşı yaşay, ruhu bozulmadı. O, sınavlar tek onıñ içün degil de, epimiz içün olğanını yahşı añlay", — dep Emil Kurbedinov qoştı.
Yaşar Şıhametov aqqında ne bilemiz
2021 senesi kiçik aynıñ 17-sinde Qırımdaki kütlevit tintüvlerden soñ işğalciler Yaşar Şıhametov ve daa beş qırımtatar adamını tuttılar.
2022 senesi berim ayınıñ 9-ında RF CQniñ 205.5. maddesiniñ 2. qısmına (RF qanunlarına köre terrorcı olaraq tanınğan teşkilâtnıñ faaliyetinde iştirak etüv) mücibi Şıhametov 11 senege maküm etildi. Tevqif müddetiniñ ibrinci dört senesini daa şiddetli şartlarnen apishanede keçirmeli.
Tevqif olunmadan evel aşçı olıp çalışqan qırımtatar adamınıñ ciddiy sağlıq meseleleri bar: hronik gipertoniya sebebinden qalp, mide, arqa ve qaara cigerler meseleleri bar. Yaramay sağlıq alı sebebinden makeme oturışları sıq sıq başqa tarihqa keçirildi. Üküm çıqarmadan evel adamğa acele yardım çağırğanlar.
2023 senesi ilk qış ayında Rusiyedeki Vlasıha şeeri Apellâtsiya makemesi, qart qırımtatar faalcisi Yaşar Şıhametovnıñ ükümini deñiştirmedi. Makeme oturışı vaqtında özüni yaramay duyğan ve aqrasınen ciddiy meseleler sebebinden qırımtatar adamını zaldan sediyede çıqardılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
