Türkiye, havfsızlıq kefaletleri çerçivesinde Ukrainağa askerlerni yollamağa tüşüne. Bundan da ğayrı, Ankara cenkten soñki Qara deñizniñ minasızlandıruvına qoşulmağa azır.
Bu aqta teleton efirinde Ukrainanıñ Türkiyedeki elçisi Nariman Celal bildirdi.
"Türkiye – stabilleştirici aqiqatı olaraq havfsızlıq kefaletlerini teminlemek çerçivesinde Ukrainağa askerlerni yollamağa endi azır olğan 10 memleketten biridir. Tek tünevin men Türkiyeniñ mudafaa naziri Yaşar Gülernen körüştim, biz pek yahşı subetleştik. Türkiye, yaqın zamanda Qara deñizniñ minasızlandıruvına qoşulmağa azır.
Hatırlatamız, Ukraina Prezidenti Volodımır Zelenskiy de yaqında "Qararlılar koalitsiyası"nıñ soñki toplaşuvında Türkiye Ukrainanıñ havfsızlıq kefaletlerine qoşulmağa azır olğanını, hususan deñiz havfsızlığı boyunca mesülietni özüne alıp, bildirgenini haber etti.
Bundan ğayrı, arman aynıñ 23-te X ağında o, Ukraina içün havfsızlıq kefaletleri boyunca iş devam ete ve bütün inkişaflar "yaqın künlerde" azır olacağını yazdı. Zelenskiy qoştı ki, o, arman aynıñ 23-te Felemenk baş naziri vazifesini becergen Dik Shoofnen telefon vastasınen subetleşti, olar Ukraina içün havfsızlıq kefaletleri aqqında da muzakere ettiler.
"Şimdiki vaqıtta Ukraina, AQŞ ve Avropa şerikleriniñ komandaları öz mimarlığı üzerinde çalışa. Yaqın künlerde bütün işlep çıqaruvlar azır olacaq", – dedi prezident.
Telegram, WhatsApp, Facebook ve YouTube-ta Suspilne Qırım haberlerine abune oluñız
