Zarar cedveli Ukrayina içün işğal etilgen topraqlarda qalğan mülkniñ ğayıp oluvı aqqında yañı kategoriyanı açtı. Arman ayınıñ başından "Vaqtınca işğal etilgen topraqlarda mülkke kiriş ya da nezaretniñ ğayıp oluvı" A3.6 kategoriyası çalışa.
Ukrayina içün Zarar cedveliniñ matbuat hızmeti bunı bildirdi.
"Bu kategoriya, em mesken, em de mesken olmağan taşınmaz mal-mülkniñ saiplerini, bütünley ya da büyük qısmını, Rusiye Federatsiyası, onıñ ükümeti, yerli ve bölge akimiyet organları ya da olarnıñ mülkiyetinde ya da nezaretinde olğan er angi teşkilâttan mustaqil olaraq, öz mal-mülklerine irişim, qullanuv, saiplik ya da idare etüv imkânlarından marum etüvni qaplap ala", — dep haberde qayd etildi.
Cedvel, Rusiye Federatsiyasınıñ Ukrayinada ya da Ukrayinağa qarşı tecavuzı neticesinde ketirilgen zarar ya da ğayıp içün berilgen bütün qabul etilgen muracaatlarnı esapqa almaq içün qullanıla.
Arizalar "Diia" ukrayin web-portalı vastasınen berile.
Hatırlatamız ki, 2025 senesiniñ ilk altı ayı devamında işğalli Qırım akimiyeti, keçken senelerde "milliyleştirilgen" — Rusiye kontrolindeki memuriyet tarafından hırsızlanğan — 25 obyektni 2,2 mlrd rubleden (660 biñ ğrıvnâ) ziyade sattı. Olarnıñ bir qısmı Rusiye arbiy hızmetçilerine destek köstermek içün qullanılacaq. Oraq ayınıñ 15-nde Telegram kanalında Qırım parlamentiniñ reisi Volodımır Konstantinov bunı bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
