2025 senesiniñ ilk altı ayı devamında işğalli Qırım akimiyeti, evelki yıllarda "milliyleştirilgen" — Rusiye kontrolindeki memuriyet tarafından hırsızlanğan — 25 obyektni sattı. Umumen alınğan paralar 2,2 milliard rubleni aştı. Olarnıñ bir qısmı Rusiye arbiylerine yardım etecek.
Oraq ayınıñ 15-nde öz Telegram kanalında Qırım parlamentiniñ reisi Volodımır Konstantınov bunı bildirdi.
Onıñ aytqanına köre, "Qırım ve Rusiyeniñ duşmanları"ndan alınğan ve "cumhuriyetniñ mülkiyeti»ne berilgen mülk, faal şekilde auktsionğa qoyula.
"Alınğan paralar cumhuriyetniñ inkişafına, arbiylerimizge ve qorantalarına yardımğa sarf etile. Bir söznen, Qırım ve Qırım sakinleriniñ faydasına hızmet eteler", — dep işğaci qayd etti.
Hatırlatamız ki, Qırımda Rusiye işğalcileri "namusız sakinler"ge qarşı basqı usullarından biri olaraq şahsiy mülkiyet obyektleriniñ qanunsız "milliyleştirilüvi"ni qullana. Umumen işğalli memuriyet eki yıl içinde tahminen 3,5 biñ mülkiyet obyektini "milliyleştirdi", olardan 1,2 biñi — 2024 senesi, dep çiçek ayında "QırımSOS" cemaat teşkilâtı bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
