İşğal etilgen Qırımda yerli sakinlerge dair basqılar devam etmekte. Ayrıca, sevastopol sportçısı ve fotografı Nadiya Grekovanı "RF QF ofitserine suiqast yapıluvı" içün 22 yılğa, 8 yıllıq tevqifinden soñ habersiz ğayip olğan sayılğan Qırım siyasiy mabusı Ğennadiy Lımeşkonı ise "ekstremizm" içün müstemlekege 2 yılğa azatlıqtan marum ettüvine mahküm ettiler.
Soñki afta içinde Qırımda qanunsız tevqifler ve ükümler aqqında Suspilne Qırım tarif ete.
Qırımda "mahkeme", gece klubına Verka Serdüçkanıñ yırını çalğanı içün 300 biñ ruble cöreme ödetti
İşğal etilgen Qırımda "Bağçasaray rayon makemesi", Pişçane köyündeki "Atmosfera" gece klubınıñ direktorına "Şçe ne vmerla Ukrayina" satırlı yırnı çalğanı içün 300 biñ ruble (90 biñ grivnağa yaqın) cöreme ödetti.
"Mahkeme qararında" bu sözler "Rusiye Federatsiyasınıñ silâlı küçlerini diskreditatsiya ete" dep yazılğan. Belli ki, başta iş, "klub musafiriniñ yır sımarlavı" aqqında edi, soñra "kompozitsiya endi müessiseniñ muzıka pleylistinde" olğanı bildirildi.
"Mahkemeniñ" qararı ilân etilgen soñ, klub memuriyeti, "Vkontakte" saifesinde beyanatını derc etip, dicey klubnıñ daimiy hadimi olmağanını qayd etti.
"2014 senesi klub hadimleri Qırım sakinlerinen beraber öz mevamını bildirdiler. Birinciden, uvut aynıñ 26-da Yuqarı Şurası yanındaki tirenüvinde bütün erkek hadimler iştirak ettiler, soñra ise, saban aynıñ 16-da keçirilgen referendumda. Dicey, tevsiye etilip bir kün içinde çalışqan. İleride Qırımda endi dicey olaraq çalışmaycaq", — dep, qayd etile yazıda.
Bu arada "Qırım Devlet şurası", "dost olmağan memleketler" ve "çetel agentleri"niñ artistleri, şu cümleden internette, yırlarnı cemaat ögünde icra etmelerini tolusınen yasaq etmek teşebbüsinen Rusiye Federatsiyası Devlet Dumasına muracaat azırlay. Bunı Parlamentniñ spikeri Volodımır Konstantinov bildirdi. Onıñ aytqanına köre, yasaq böyle eserlerni internette kösterüv, icarağa berüv ve yerleştirüvge de ait olmaq kerek.
"Onıñ içün küreşmek vaqtı keldi": rus ofitserini öldürmege tırışqanında qabaatlanğan Nadiya Grekovanıñ ikâyesi
Rostov-na-Donu şeerindeki Cenübiy rayon arbiy mahkemesi, Sevastopol (Aqyar) şeeriniñ sakini Nadâ Grekovanı 22 yılğa apiske mahküm etti. O, "teraktnıñ teşkil etilmesi", "patlavnıñ azırlanuvı", "satqınlıq" ve "terrorcılıq faaliyetini alıp barmaq maqsadınen oquv keçmek"te qabaatlanğan, dep, mahkemeniñ saytında derc etilgen işniñ qararında qayd etile.
39 yaşındaki Nadiya Grekova, "Rusiye Federatsiyasınıñ Qara deñiz flotından rus askeri icarağa alğan öz dairesine patlayıcı maddeler qoyğanında" qabaatlandı. FTH-nıñ malümatına köre, 2023 senesi oraq ayından başlap qadın "Ukraina Havfsızlıq hızmetine bağlandı, patlayıcı aletnen koordinatalarını, em de onı yerleştirüv ve faalleştirüv aqqında talimlerni aldı".
Şimdi o, Rostov-na-Donudaki cezahanesinde buluna. Onı Rusiyeniñ "ekstremistler ve terroristler" cedveline kirsettiler.
Qırımda Ukraina vatandaşını "Azov" ukrain polkını maliyetleştirgeni içün 9 yılğa apiske aldılar
Tahqiqatqa köre, qabaatlanğan adam, Qırımda olğanda, öz esabından "Azov" mahsus maqsatlı 12-nci brigadasına para avuştırğan.
"Qırımda yaşağan cevapkâr öz esabından "Ukraina askerleştirilgen milletçiler birleşmesi "Azov" terror teşkilâtına para avuştırdı. Bu paralar uniforma ve tehnika satın aluvğa ayırılğan edi", — dep, qayd etile FTH-nıñ beyanatında.
İşğal teşkerüvine köre, adam, "öz qabaatını tolusınen boyun aldı ve teşkerüvnen işbirlik yaptı". Onı yüksek havfsızlıqlı apishanede 9 yılğa mahküm eteler, birinci eki yılını ise apshanede keçirmek kerek. Ukraina akimiyeti, bu vaziyet aqqında daa fikir bildirmedi.
Sevastopol şeerinde "satqınlıqta" şübelengen bir adam yaqalandı
İşğal etilgen Sevastopolda (Aqyar) yerli sakin yaqalandı, oña qarşı "satqınlıq" içün cinaiy davası açıldı. "Tahqiqatnıñ" versiyasına köre, o, Rusiye ordusınıñ avadan qorçalanuv tehnikasınıñ yerleştirilmesi aqqında ukrain istihbaratına malümatlarını ve olarnıñ yerleşken yerleriniñ koordinatalarını berdi.
"Tahqiqatnıñ" malümatına köre, adam, Ukraina Silâlı Quvetleriniñ mahsus areketler küçleriniñ vekilinen Telegram vastasınen bağlanğan.
"Kuratornıñ vazifelerine köre, iştirakçi, Sevastopoldaki AQM foto ve video qayd etüvini yaptı. İştirakçi, şahs cenk vazifesinde avadan qorçalanuv maşinalarınıñ yerleştirilmesi aqqında alğan malümatnı ve olarnıñ yerleşken yerleriniñ koordinatalarını ukrain istihbarat hızmetine berdi", – iddia ete Qırım boyunca işğal RF FTH.
Olar qoştılar ki, bu adamnı "satqınlıq" içün ömürbillâ mahkeme cezası bekley.
Apis müddetinden habersiz ğayip olğanı kibi sayılğan Qırım siyasiy mabusı Lımeşkonı 2 yılğa azatlıqtan marum ettiler
RF-da Stavropoldaki Kursk rayon makemesi, 8 yıllıq apis müddetini keçirgen soñ habersiz ğayip olğanı kibi sayılğan Qırım siyasiy mabusı Ğennadiy Lımeşkonı 2 yılğa qattı nizamlı müstemlekesine mahküm etti. Bunıñ aqqında oraq aynıñ 30 içün rusiye makemesiniñ qararında denile.
Lımeşkonı internette ekstremizmge çağıruvlar aqqında maddesi (RF-nıñ Cinaiy kodeksiniñ 280 m. 2 q.) içün qabaatlı dep tanıdılar.
Rusiye tahqiqatınıñ versiyasına köre, erkek, öz içtimaiy ağlarda milliy alâmetlerge köre tecavuzğa çağıruvlarnen bazı malümatlarnı paylaştı.
Yüzlerce insan: Rusiyeliler sabıq qırım siyasiy mabuslarnı sürgünlik merkezlerinde nasıl tutalar
İşğal etilgen Qırımda 10 yıl devamında apiste bulunğan sabıq siyasiy mabus Andriy Kolomiyets, azat etilgen soñ, aman-aman altı ay devamında Rusiye Federatsiyasınıñ Krasnodar vilâyetindeki sürgünlik merkezine zornen alıp ketildi. Sebebi – ukrain pasportınıñ müddeti bitkeni edi – apiske alınğanı sebebinden yañı fotonı vaqtında yapıştırıp olamadı. O, telükege baqmadan, Ukrainağa qaytmağa muvaffaq oldı.
İnsan aqları faali Ölga Skrıpnik qayd ete ki, yüzlernen ukrain vatandaşları Rusiye sürgünlik merkezlerinde qalalar. Onıñ aytqanına köre, Rusiye akimiyetiniñ, hususan Mudafaa nazirliginiñ vekilleri olarğa Rusiye vatandaşlığını almaq ve Ukrainağa qarşı cenkte iştirak etmek içün basım yapalar. Qanunsız apiske alınuv müddeti bitken soñ siyasiy mabüslerge qarşı yañı davalar açılğan allar da ola. Böyle vaziyet, endi Dmitriy Ştıblıkov ve Ğennadiy Lımeşkonen olğan edi.
Suspilne Qırım, Rusiye Federatsiyasınıñ sabıq ukrain siyasiy mabüsleri tutulğan sürgünlik merkezleri aqqında daa çoq bilgi ala.
Telegram, WhatsApp, Facebook ve YouTube-ta Suspilne Qırım haberlerine abune oluñız
