İşğalli Qırım akimiyeti yarımadadaki bir sıra uquqiy ve fizikiy şahıslarnıñ mülküni qanunsız olaraq "milliyleştirdi". Onı Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ mülkiyetine berdiler. Bu, 13 şahısnıñ, hususan 7 şirketniñ mülkiyetidir.
Sevastopolnıñ (Aqyarnıñ) işğalli gubernatorı Mihail Razvojayev Telegramda bunı bildirdi.
Onıñ aytqanına köre, mülk saipleri Ukraina ordusını, 520 biñ dollar toplağan hayriye fondı vastasınen maliye ete ediler.
İşğalciler tarafından "milliyleştirilgen" mülk cedveline aşağıdaki müessiseler kirdi:
- "Mayak" gemilerniñ ışıq tehnikası zavodı" TOV;
- "Gemilerniñ ışıq tehnikası zavodı" TOV;
- "Plosk" TOV;
- "Tinos" TOV;
- "Tehnotron" işletüv teşkilâtı" TOV;
- "No1 tehnikiy işletüv merkezi" TOV;
- "KORPUS" istisal kooperativi.
Kiçik qış ayında işğalli Qırım akimiyeti 700-den çoq obyektni qanunsız olaraq "milliyleştirdi", şu cümleden "Qırım alkogolsızbira kombinatı".
Ukraina prezidentiniñ Qırım Muhtar Cumhuriyetindeki daimiy temsilcisi Olğa Kurışkonıñ aytqanına köre, işğalli akimiyet tarafından qabul etilgen vesiqalar ve qararlar tanılmay ve uquqiy aqibetleri yoq.
"Ve bu üç qısımğa aittir: devlet mülkiyeti, şirket ve şahsiy mülkiyet. Biz devlet ve şahsiy sektorlarnı baqıp çıqtıq. Devletiy — bu, devlet olaraq bizge ait olğan şeyler bizge qala, dep añlaşılğan bir şeydir. Şahsiy mülkiyet aqqında söz yürsetilse, yanaşuv böyle olur: eger bu qanunsız aluv olsa, qanunsız qararlar tasdıqlanmaz ve er şey ilk vaziyetke qaytarılır", — dedi o.
Hatırlatamız ki, işğal etilgen Qırımda 2024 senesi 560 fizikiy ve uquqiy şahısnıñ mülkiyetini "milliyleştirdiler", Sevastopolda (Aqyarda) 135 binağa tesir etti. Umumen, zapt etilgen mal-mülkniñ satıluvı içün yarımadanıñ işğalli akimiyeti 4,4 mlrd ruble aldı, olarnı içtimaiy ihtiyaclarğa sarf etmege planlaştıra, dep Ukraina prezidentiniñ Qırım Muhtar Cumhuriyetindeki daimiy temsilcisiniñ muavini Denıs Çıstikov bildirdi.
Telegram, WhatsApp ve Facebookta Suspilne Qırım haberlerine abune oluñız
