Oraq ayınıñ 5-nde saat 14:00-da Kıyivdeki Squat 17b sanat boşluğında ressam Renata Asanovanıñ Tamırlar sergisi — keramika, grafik ve müellif örnekleri vastasınen qırımtatar tamırlarına şahsiy seyaat — açılacaq.
Qırım Daily leyhası Facebookta bunı bildirdi.
Tedbir, Qırım platforması Ofisi ve Qırımtatar Milliy Meclisi tarafından desteklengen "Saba Qavesi" medeniy tsiklniñ bir qısmıdır. Sergi arman ayınıñ 6-na qadar devam etecek.
Renata Asanova — Özbekistanda doğğan ve şimdiki vaqıtta Kıyivde çalışqan qırımtatar sanatçısı. Sergide "Qırım ve Ev", "Tahmin etilmegen toqunuvlar" leyhalarındaki eserler taqdim etilecek, bunen beraber, sanatkârnıñ qırımtatar ananeviy örneklerini yañıdan añlağan yañı eserleri kösterilecek.
Bundan da ğayrı, eksponatlar arasında qadın endamı ve timsaliy tamırlarnı içki dayanıqlıq ve hatıra timsalleri olaraq birleştirgen keramik barelyef de olacaq.
Serginiñ açılışında Elmar dji setini taqdim etecek — vinilde siyrek qırımtatar kompozitsiyaları çalınacaq.
Kiriş bedava, amma er musafir, "Yastrubı" 411-inci şahsiy uçucısız sistemaları polkunıñ 2-nci "Şedrık" batalyonı içün radioelektron küreş sisteması (REB) içün para toplaşuvına qoşula bile.
Em de ananeviy usulnen qumda pişirilgen qave ve baqlava hayriye olacaq — bütün paralar arbiylerge yardım etecek. Tedbir vaqtında hayriye auktsionı da keçirilecek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
