2025 senesi çiçek ayınıñ 8-nde Rostov-na-Donu şeerinde Volodımır Ananyevniñ uydurılğan davası boyunca oturış keçirilecek. Onı ve daa eki insannı — Volodımır Bodnar ve Oksana Şevçenkonı — işğalciler Rusiye kontrolindeki "Qırım yolbaşçısı" Sergiy Aksönovğa ücüm etkeninden qabaatlaylar, sanki olar "UHH emirinen maşna patlavını azırlağanlar".
Kiçik ayda Ananyev işğal etilgen Simferopolda (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adte) tutulğan soñ bir yıl oldı. Onıñ tuvğanları apishanede qalıp sağ qalmaycağından qorqalar. O, 75 yaşında, ayaqları qıyın, areket etmesi qıyın, körmesi qıyın.
Ukrainanıñ eñ qart siyasiy mabüsi aqqında Suspilne Qırım onıñ apayı Anna Svâtnenkonen laf etti.
Anna hanım, Kremlniñ 75 yaşındaki siyasiy mabüsi olğan aqayı Volodımır Ananyevden mektüp oquy. O, tutula, ve pek qasevetlene, dep yaza. Keçken sene kiçik ayda onı işğal etilgen Qırımda FSB hadimleri terror ücümini azırlağanı içün tuttılar. Qadın, aqayınıñ apiske alınğanını ilk sefer körgenini hatırlay.
"Er şey videoğa çekildi — qapı yanında turğanlarını, qapını açqanlarını. Nevbetteki körüşüvde Volodâ yerge yüzüni çevirip, maykada kiyimsiz yata. Soñra FSB hadimi o evde tapılğan patlayıcı aletni baqa", — dey Anna Svâtnenko.
Volodımır Ananyev İvano-Frankivst vilâyetinde doğdı, amma üç yaşında olğanda qorantası Keriçke köçti. Mektepten soñ paytahtqa köçkenine qadar, o, anda balalığını keçirdi.
"O, Keriç ve Qırımnı o qadar seve ki, er yıl mektepke mezunlar körüşüvlerine bara edi. Olarnıñ sayısı az qaldı, lâkin olar ömürleri devamında körüşmege devam ettiler", — dep siyasiy mabüsniñ qadını tarif etti.
Adam Ukraina Halq areketiniñ azası edi, vatanperver, cemaat faaliyetinen oğraşa edi. Hususan, Qırımda yarımadada topraq saipleriniñ aqlarını qorçalay edi. Anna hanım onı tesadüfen, 1987 senesi soqaqta tanıdı. Qadın olarnıñ birinci körüşüvini hatırlay.
"Boğdan Hmelnıtskıy meydanında tanış oldıq. Volodâ, ğaliba, işten ketken edi, men ise anda öz işlerimnen oğraşa edim, amma iç bir yerge ketmege istemey edim. Bu işlerden qurtulmaq içün qayda muracaat etecegimni tüşündim. İşte, maña qave içmege teklif ettiler", — dey Anna Svâtnenko.
Volodımır Ananyev er yıl yarımadağa barğan edi. 2023 senesi boş ayda, tolu miqyaslı istilâ vaqtında bile, soy-soplarını ziyaret etmege qarar berdi. Qadın, aqayını Qırımğa barmamağa razı etmege tırışqanını hatırlay.
Men oña dedim: "Volodâ, 2014 senesi ve 2022 senesi — eki büyük farq. 2023 senesi. Sen barmaq kerek degilsiñ, çünki sen, öz fikirleriñni iç bir vaqıt gizlemey ediñ, añlaysıñmı? O, er vaqıt cemaat faalcisi edi, ve anda da onı tanıy ediler. Men de: "Sen bu telükege oğraysıñ", dedim. İnsan normal bir insan kibi tüşüne edi. 75 yaşında adam, öz vatanına kete, onı apiske alacaqlar ve SİZOğa atacaqlar, kimniñ aqlına kele bile?" — dey o.
2024 senesi kiçik aynıñ 4-nde FSB Ananyev ve daa eki insannı yaqaladı. Er kesni Qırımnıñ işğalli yolbaşçısı Aksönovnıñ maşnasını patlatmaq niyetinde qabaatladılar. Rusiye taqiqatınıñ malümatına köre, 75 yaşındaki pensiyacı Ananyev öz başına yapılğan patlayıcı saqlağan edi. Daa soñra oña daa bir qabaatlav maddesini qoştılar — terakt azırlavında yardım etüv.
"Volodânı bir yıl devamında SİZOda tuta ediler. O, qabaatını tanımadı, bu organlarnen işbirlik yapmadı, ve şimdi onı Qırımdan Rostovğa avuştıralar, çünki bu terror maddelerine köre makeme tek Rostovda keçirile — yerlilerge işanmaylar", — dep Anna Svâtnenko tarif ete.
Apiske alınğan soñ aqayınen yalıñız advokatına yazğan mektüpleri vastasınen laf ete. Volodımır Ananyevni Rostovğa yolladılar, anda çiçek ayınıñ 8-nde sahte dava boyunca makeme oturışı olacaq.
"75 yaşı — inanılmaz bir şey. Bir adamnı bir şeysiz tutıp, bunıñ kibi qorqunçlı cinayetnen qabaatlaylar. O, istese de, fizikiy ceetten iştirak etip olamay edi. Qısmen olsa, biz körüşe bilecekmiz, dep ümüt etem. Ümüt etem ki, halqara teşkilâtlarnıñ basqısı neticesinde bu kibi insanlar, hususan bu yaşta olğanlar, evlerine qaytacaqlar", — dey qadın.
75 yaşındaki Ananyev — Qırımnıñ eñ yaşlı siyasiy mabüsidir. Onıñ ağır hronik hastalıqları bar ve o, daima tibbiy baqıluvğa muhtac. Anna hanımnıñ qayd etkenine köre, aqayı apishanede öle bilir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
